Motra e Sokol Prekës akuzon institucionet shtetërore për mungesën e shërbimit të urgjencës në kohën kur vëllai i saj dhe 46-vjeçari David Deda u goditën nga energjia elektrike në Karmë të Vau Dejës. Familjarët e dy viktimave, së bashku me një grup banorësh, zhvilluan një protestë përpara qendrës shëndetësore të Vau Dejës, duke kërkuar përgjegjësi për mungesën e ndihmës së shpejtë mjekësore.
Sokol Preka, 40 vjeç, pronar i një lokali dhe David Deda, 46 vjeç, me profesion elektriçist, humbën jetën pas kontaktit me energjinë elektrike. Njëri prej tyre ndërroi jetë në vendngjarje, ndërsa tjetri pak minuta më vonë, teksa familjarët dhe banorët prisnin ndihmën mjekësore. Sipas protestuesve, situata u rëndua edhe më tej për shkak se ambulanca e Vau Dejës prej rreth një muaj e gjysmë është jashtë funksionit për shkak të një defekti. Ambulanca e ardhur nga Shkodra mbërriti shumë vonë, duke bërë që ndërhyrja mjekësore të mos ishte në kohën e nevojshme.
Familjarët thonë gjithashtu se është kërkuar edhe ndërhyrja e helikopterit për transportimin dhe dhënien e ndihmës së specializuar, por përgjigjja ka qenë negative. ”Ku ishte shteti kur kishim nevojë për ndihmë?”, ishte apeli i familjarëve, të cilët fajësojnë institucionet për mungesën e një ambulance funksionale dhe të shërbimit të urgjencës gjatë orëve të pasdites. Familjarët kërkojnë që ngjarja të hetohet dhe të përcaktohet nëse vonesa e shërbimeve të emergjencës ka ndikuar në humbjen e jetës së dy viktimave.
