Trupat inspektuese të AKU-së kanë kryer 436 inspektime dhe monitorim si pjesë e Task-Forcës Anti-Covid gjatë 24 orëve të fundit.
AKU bën me dije se grupet e Task-Forcës këmbëngulin gjatë çdo monitorimi në biznese që të zbatohet protokolli i sigurisë, higjienizimi i ambienteve, mbajtja e detyruar e maskës në ambiente të mbyllura dhe distanca fizike, si masa kufizuese të përhapjes së virusit.
Sipas njoftimit gjatë inspektimeve janë dhënë tre masa administrative në operatorë të biznesit ushqimor. “Një masë administrative është dhënë në një subjekt për mungesë të kushteve higjieno-sanitare. Një tjetër masë është dhënë në një njësi tregtimi mishi, për tregtim të produktit mish pa vulë dhe certifikatë veterinare. Një masë e tretë është dhënë nga trupa inspektuese e AKU-së në një subjekt për therje jashtë kushteve të lejuara.”
Gjithashtu po sipas këtij njoftimi me kërkesë të dy subjekteve është bërë asgjësimi i 32.317 ton produkte ushqimore si dhe referuar Planit të Marrjes së Mostrave, janë marrë 16 mostra kryesisht në fruta-perime për analizim të mbetjeve pesticide.
Autoriteti Kombëtar i Ushqimit do të vazhdojë punën pandërprerë në terren në garantim të sigurisë ushqimore dhe mbrojtjes së shëndetit të konsumatorit.