Mustafaj flet për protestën: PD duhet të ripërtërihet, Shqipëria jeton në një autokraci moderne

Anëtari i PD-së, Andi Mustafaj, kundërshtoi idenë se humbjet e opozitës lidhen vetëm me mungesën e frymëzimit nga PD-ja, duke argumentuar se realiteti politik në Shqipëri është shumë më kompleks. Për të vendi funksionon si një “autokraci moderne”, ku opozitës i ngarkohen të gjitha përgjegjësitë, ndërsa nuk i njihen meritat.

“Veprojmë sikur jemi në një demokraci funksionale të vendeve skandinave, ndërkohë që ne jetojmë brenda një autokracie moderne”, u shpreh Mustafaj, duke shtuar se gjatë fushatës ka parë nga afër vështirësitë me të cilat përballet opozita në terren.

Ai theksoi se kritikat ndaj PD-së nuk shpjegojnë plotësisht situatën politike, duke ngritur pyetje mbi mungesën e mbështetjes edhe për forca të tjera opozitare dhe organizime të shoqërisë civile. Sipas tij, “i vendosen mbi shpatullat e Partisë Demokratike çdo lloj peshe, por nuk i njihet asnjë gjë pozitive”.

Duke folur për të ardhmen e PD-së, Mustafaj kërkoi një proces të thellë ripërtëritjeje, jo vetëm në emra, por edhe në ide dhe mënyrën e organizimit. “Hapi tjetër për të luftuar regjimin e Edi Ramës është profesionalizimi i partisë. Kalimi nga një parti fryme në një parti plotësisht moderne dhe profesionale”, deklaroi ai.

Sa i përket protestës qytetare, Mustafaj vlerësoi energjinë dhe angazhimin e pjesëmarrësve, duke thënë se ajo tregon potencialin e qytetarëve kur u krijohen hapësira për t’u shprehur. “Leksioni kryesor i kësaj proteste është që kur qytetarët u çlirohen energjitë, ata janë shumë pozitivë dhe shumë ndërtues”, tha ai, duke shtuar se edhe PD-ja duhet të reflektojë mbi mënyrat për të rritur përfshirjen dhe besimin e qytetarëve në jetën politike.