Naftëtarët në grevë, PAA: Qeveria të mos fshihet më si struci. I ka gënjyer ҫdo prag zgjedhje

”Pse në prag të ҫdo zgjedhje i keni prezantuar oligarkë të rinj që do të investonin teknologji moderne? Kush duhet ta ndiqte planin e investimeve? Kush duhet të ndalonte në kohë vjedhjen e naftëtarëve?”, kështu thuhet në deklaratën për shtyp të Partisë Agrare Ambientaliste, ku ndër të tjera akuzohet qeveria në lidhje me situatën e naftëtarëve. ”PAA apelon se naftëtarëve ju duhet ofruar zgjidhje dhe jo mëshirë. Ata duhen respektuar dhe jo kërcënuar”,- thuhet më tej në njoftimin për shtyp.

Deklarata e plotë

Ja pse qeveria i ka shërbyer oligarkëve dhe jo naftëtarëve. Ja e drejta ligjore e naftëtarëve, sipas Drejtorisë së Përgjithshme të Tatimeve sigurimet shoqërore derdhen jo më vonë se data 20 e muajit pasardhës. Ligji 7703/93 për sigurimet shoqërore në nenin 18 qartëson se “Pagesat e kontributeve gëzojnë përparësi në raport me detyrimet fiskale dhe borxhet. Për kontributet e paderdhura nga subjektet brenda afatit, organet e sigurimeve shoqërore kanë të drejtën të nxjerrin akt-detyrimi, i cili është titull ekzekutiv dhe ekzekutohet nga zyra e përmbarimit”.

Pse nuk ka dalë akt-detyrimi për kompaninë që në muajin e parë të mos-pagimit të sigurimeve shoqërore? Kush i ka lejuar oligarkët të vazhdonin të trajtonin si skllevër naftëtarët? Ky është krim. Nëse shteti i Ramës do të zbatonte ligjin, që në muajin e parë të mos-pagesës së sigurimeve shoqërore, oligarkët nuk do të vazhdonin dot skllavërimin e punonjësve. Naftëtarët do të përfshiheshin në skemat e mbrojtjes sociale të papunësisë, trajnimit dhe ri-trajnimit për punësim.

Ҫfarë përfitimesh kanë pasur oligarkët nga vjedhja e pagave dhe sigurimet e papaguara të naftëtarëve? Nxirrni përgjegjësitë ligjore z. Rama për këdo që ka shkelur ligjin dhe ju ka vjedhur naftëtarëve pagat dhe sigurimet shoqërore. Pse në prag të ҫdo zgjedhje i keni prezantuar oligarkë të rinj që do të investonin teknologji moderne?
Kush duhet ta ndiqte planin e investimeve? Kush duhet të ndalonte në kohë vjedhjen e naftëtarëve? Ju dhe qeveria juaj jeni përgjegjëse ligjore dhe materiale për vjedhjen e naftëtarëve. PAA apelon se naftëtarëve ju duhet ofruar zgjidhje dhe jo mëshirë.  Ata duhen respektuar dhe jo kërcënuar.