Nazarko: Mazhoranca ka interes që protesta të përshkallëzohet

Analisti Mentor Nazarko ka deklaruar se mazhoranca socialiste mund të ketë interes që protesta qytetare të përshkallëzohet, pasi një situatë e tillë do ta dëmtonte imazhin e saj si në opinionin publik, ashtu edhe në atë ndërkombëtar. Nazarko e lidh këtë qëndrim edhe me mënyrën se si kryeministri Edi Rama po paraqitet përballë zhvillimeve të protestës.

Sipas tij, qeveria po përpiqet të shfaqet në rolin e viktimës, ndërsa përshkallëzimi i protestës do të mund të ndikonte negativisht tek vetë kauza e protestuesve. “Mazhoranca ka interes që protesta të arrijë në nivele përshkallëzimi që e negativizojnë atë, qoftë në sytë e opinionit publik, qoftë në sytë e opinionit ndërkombëtar”, u shpreh Nazarko në ”A2cnn”.

Ai theksoi se zhvillimet nuk mund të shihen vetëm në dy ngjyra, pasi edhe protesta, sipas tij, përmban qëndrime dhe aktorë të ndryshëm. “Nuk mund ta shikoj ngjarjen që po zhvillohet në bulevard bardhezi. Edhe protesta ka shumë ngjyra”, tha analisti.

Në këtë kontekst, Nazarko vlerëson se shumëllojshmëria e protestës është njëkohësisht edhe burim force, por edhe një faktor që e vështirëson gjetjen e një zgjidhjeje të shpejtë. “Shumëngjyrësia e saj është edhe fuqia e saj, por është edhe burim i një pamundësie për një zgjidhje të shpejtë”, përfundoi Nazarko.