Ndahet nga jeta ish-deputeti i PD, Berisha dhe Basha mesazh ngushëllimi

Aktualitet E Diel, 27 Gusht 2023 21:57

Është ndarë sot nga jeta ish-deputeti i PD Baki Shehi. Berisha shkruan: Gjeneral Baki Shehu mbylli sytë përgjithmonë.

Të dashur miq, gjeneral Baki Shehu, njëri nga figurat më të shquara të ushtrisë sonë, ish deputet i Partisë Demokratike, politikan i urtë, atdhetar i flaktë, mbylli sytë përgjithmonë. Gjeneral Baki Shehu si ushtarak i lartë, dha kontribut të çmuar në detyrat më të larta në drejtimin e ushtrisë, reformimin dhe transformimin e saj në ushtri aleate të NATO-s. Ai u zgjodh gjithashtu deputet i Partisë Demokratike në Kuvendin e Shqipërisë, në të cilin përfaqësoi me dinjitet e përkushtim zgjedhësit e e tij dhe të PD.

Duke shprehur nderimin dhe mirënjohjen time për bashkëpunimin që kemi patur dhe kontributin e gjeneral Baki Shehut, i shpreh familjes së tij të nderuar, miqve dhe të afërmve, ngushellimet më të ndjera dhe i lutem zotit që shpirti i tij i mirë të gjejë paqen e merituar. Amin!

Ndersa kreu i Partisë Demokratike, Lulzim Basha, ka shprehur ngushëllimet e tij përmes një postimi në rrjetet sociale.

Mesazhi i plotë:

Mësova me hidhërim ndarjen nga jeta të Baki Shehit, deputet i Partisë Demokratike, gjeneral i Forcave të Armatosura dhe studiues i apasionuar i historisë. I dashuruar pas vendlindjes së tij, të cilës i përkushtoi me pasion dhe humanizëm aktivitetin e tij politik, përmes një pune të gjatë e të palodhur, Baki Shehi hulumtoi me kërshëri të shkuarën e lashtë të Ndroqit, duke i dhënë jetë një libri që do të mbetet testament i lidhjes së tij të ngushtë me këtë komunitet, të cilit i shërbeu me devocion dhe dashuri.

Ndonëse i sfiduar dhimbshëm nga dallgët e jetës, gjeneral Baki Shehi ruajti përherë zemërgjerësinë dhe fisnikërinë me të cilën do të kujtohet nga miqtë dhe kolegët e tij. Me ndarjen e tij nga kjo jetë Partia Demokratike humbi një prej kontribuesve të saj të vyer.