Deri në fillim të muajit Mars, mbi 1100 biznese janë ndëshkuar për shkak të shkeljes së legjislacionit tatimor dhe mesa duket përhapja e coronavirusit në vendin tonë mund t’i japë një ndalesë të përkohshme fushatës anti-informalitet, për shkak se administrata nuk është në punë si normalisht dhe sipërmarrja po kalon një periudhë të vështirë. Gjatë këtij viti, administrata tatimore në kuadër të planit anti-informalitet ka ushtruar 3661 kontrolle në subjekte në të gjithë vendin dhe ka kapur në shkelje 1121 mijë biznese.
Konkretisht shifrat e Drejtorisë së Përgjithshme të Tatimeve i përkasin periudhës 2 Janar-4 Mars 2020, ku Strukturat e Monitorimit në Terren kanë bërë verifikime në të gjithë territorin e vendit, në zbatim të Planit Operacional 2020. Ky plan përcaktohet sipas elementëve të identifikuar të riskut nga analiza e deklarimeve të tatimpaguesve në sistemin tatimor, si edhe ndjekjen e të gjitha rasteve të denoncimeve që vijnë nga qytetarët, të cilët konstatojnë shkelje të ligjit në marrjen e shërbimit.
Ndër shkeljet kryesore të konstatuara kanë të bëjnë me subjekte të paregjistruara, për të cilët është marrë masa e bllokimit deri në momentin e regjistrimit të tyre pranë QKB dhe organeve tatimore; moslëshim të kuponit tatimor; subjekte me me punonjës të padeklaruar, apo pa pajisjen fiskale; si dhe subjekte që nuk i mbanin pajisjet fiskale në gjendje pune. Po ashtu janë konstatuar edhe biznese që dispononin mallra pa dokumentacion tatimor.
