Ndryshojnë çmimet e karburanteve, Bordi i Transparencës publikon tarifat e reja të naftës dhe benzinës

Bordi i Transparencës ka vendosur çmimet e reja për tregtimin e karburanteve në vend. Sipas vendimit të marrë më 10 tetor 2026, nafta dhe benzina do të tregtohen me çmime të përcaktuara, të cilat do të jenë në fuqi deri në mbledhjen e ardhshme të bordit.

Sipas njoftimit zyrtar, çmimi i shitjes me pakicë i naftës nuk duhet të kalojë 211 lekë për litër, ndërsa çmimi i shitjes me shumicë është përcaktuar në një maksimum prej 199 lekësh për litër.

Për benzinën, kufiri maksimal i çmimit të shitjes me pakicë është caktuar në 195 lekë për litër, ndërsa për shitjen me shumicë çmimi nuk duhet të kalojë 183 lekë për litër.

Vendimi i ri është marrë në kuadër të masave për kufizimin e përkohshëm të çmimeve të nënprodukteve të naftës dhe gazit, në kushtet e situatës së veçantë të shpallur në tregun e hidrokarbureve.

Çmimet e përcaktuara nga bordi kanë hyrë në fuqi më 10 tetor, në orën 12:30, dhe do të mbeten të vlefshme deri në një vendimmarrje të re, kur do të shqyrtohen ndryshimet e mundshme të çmimeve të shitjes.

Bordi u ka bërë thirrje të gjithë operatorëve që tregtojnë karburante me shumicë dhe pakicë të zbatojnë detyrimisht vendimin e marrë. Në rast se konstatohen shkelje nga subjektet që operojnë në këtë sektor, ndaj tyre mund të vendosen masa, deri në pezullimin e aktivitetit.

Ministria e Ekonomisë dhe Inovacionit, Ministria e Financave dhe Ministria e Infrastrukturës dhe Energjisë kanë deklaruar se janë të angazhuara për mbrojtjen e interesave të konsumatorëve shqiptarë dhe garantimin e konkurrencës së ndershme në treg.