Greta Gjoci është dërguar në burgun e Pojskës për të vuajtur dënimin me 6 vite e 8 muaj burg për mashtrim kompjuterik, si pjesë e grupit të drejtuar nga Bruno Çobo. Ajo ndodhet në burg së bashku me foshnjën e saj vetëm 3-muajshe, e cila ende ushqehet me gji. Sipas burimeve, nënë e bijë janë vendosur në seksionin e posaçëm ku ndodhet edhe çerdhja e institucionit.
Mbrojtja e Gjocit i është drejtuar GJKKO-së me kërkesë për shtyrjen e ekzekutimit të dënimit, duke u bazuar në nenin 476 të Kodit të Procedurës Penale. Avokati Ndue Marku argumenton se mosndarja e nënës nga foshnja është e domosdoshme për shkak të moshës së saj dhe ushqyerjes me gji. Sipas mbrojtjes, Gjoci ka respektuar masën e “arrestit në shtëpi” dhe nuk ka shfaqur asnjë tendencë për t’iu shmangur drejtësisë. Për këtë arsye kërkohet që ajo të qëndrojë në arrest shtëpie deri në shqyrtimin e kërkesës.
Seanca në GJKKO është caktuar të hënën. Ndërkohë, pas kërkesës së avokatit për verifikimin e kushteve në burg, Mekanizmi për Parandalimin e Torturës është nisur drejt Pojskës. Gjoci është njëra prej gjashtë grave të dënuara në dosjen e grupit të Bruno Çobos. Edhe katër gra të tjera kanë kërkuar shtyrjen e ekzekutimit të dënimit për shkak të fëmijëve të mitur.
Grupi dyshohet se mashtronte kryesisht qytetarë italianë përmes një Call Center-i në Tiranë, duke i bindur të investonin në bursa. Nga skema dyshohet se u përvetësuan rreth 4.7 milionë euro. Për 16 të pandehurit, Apeli i Posaçëm la në fuqi dënimet me rreth 110 vite burg, ndërsa Bruno Çobo u dënua me 8 vite burg.