Nënshkruhet marrëveshja shtet-banka-sipërmarrje, Kryeministri: Ndikim të drejtpërdrejtë për rritjen ekonomike

Nënshkruhet marrëveshja mes shtetit, bankave dhe sipërmarrjes për të vënë në zbatim programin “Dyfisho sipërmarrjen tënde”. Programi është i bazuar në kredi të buta me fokus sektorin e bujqësisë dhe ndërmarrjet e vogla dhe të mesme.

I pranishëm në këtë aktivitet ka qenë edhe Kryeministri Edi Rama, i cili u shpreh se kjo është një ndërmarrje shumë e rëndësishme për rritjen e kapacitetit ekonomik.

“Jo për formalitet, por për sinqeritet, falënderoj të gjitha bankat dhe bordin e Bankës së Shqipërisë për angazhimin dhe diskutimet që kemi pasur për arritjen e kësaj dite të shënuar për sipërmarrjen shqiptare. Dje, presidentja e Bankës Europiane të Investimeve vizitoi për herë të parë Shqipërinë në kuadër të nënshkrimit të një marrëveshjeje me një bankë private dhe mendoj se kjo duhet të ndiqet edhe nga bankat e tjera të nivelit të dytë.

Është një marrëveshje që ecën në të njëjtën linjë me marrëveshjen e sotme, me qëllim investimin në ndërmarrjet e bizneseve të vogla, të cilat përbëjnë një kapacitet të madh. Kam parë vetë ndërmarrje të shqiptarëve dhe shqiptareve të kthyer nga jashtë, me synimin për të bërë diçka domethënëse në komunitet dhe për të punësuar familjarët dhe njerëzit përreth. Kanë qenë përvoja të jashtëzakonshme dhe premtuese.

Kam parë se, me një mbështetje nga ana jonë, ato ndërmarrje mund të rriten dhe të japin një kontribut të madh në ekonominë tonë. Në fund të çdo bisede, problemi ka qenë financimi i aksesueshëm dhe pamundësia për të marrë kredi të zakonshme, të cilat janë të papërballueshme për ta. Ky projekt lindi për bujqësinë dhe tashmë është zgjeruar, duke u shndërruar në një nismë shumë serioze për mbështetjen e bizneseve të vogla dhe të mesme.

Pak kohë pas kësaj marrëveshjeje, ata do të kenë mundësinë të aplikojnë në këtë nismë. Pesë vite më parë, kredia në Shqipëri ishte rreth 5 miliardë euro, ndërsa sot është 10 miliardë euro. Kemi dyfishuar kapacitetin financiar të bankave të nivelit të dytë, çka tregon rritje të ekonomisë dhe potencial për zhvillim të mëtejshëm. Kreditë e këqija janë ulur shumë ndjeshëm dhe nuk përbëjnë më kërcënim. Dhjetë vite më parë, ato ishin 25% e totalit. Kjo është një arsye më shumë për të hedhur një hap kurajoz, falë bashkëpunimit dhe gatishmërisë së plotë të Bankës së Shqipërisë për të mbështetur rritjen ekonomike.

Për bizneset e vogla dhe të mesme do të vihet në dispozicion një linjë kredie me interes 2–3%. Kjo nismë është shoqëruar me një garanci sovrane nga shteti shqiptar, e cila varion nga 30% deri në 70%. Bankat duhet të jenë më kurajoze edhe ndaj sektorit të bujqësisë, ku padyshim rreziku është më i lartë, por teknologjitë e reja dhe agroturizmi e kanë ulur këtë aspekt.

Unë besoj shumë se edhe një fond granti, që do të vihet në dispozicion për hartimin e planeve të biznesit dhe për të ndihmuar bizneset në aplikim, do të sjellë vlerë të shtuar në lehtësimin e marrëdhënieve mes subjekteve dhe bankave. Uroj që guvernatori të na vërë në dispozicion dy zëvendëset e tij për të na ndihmuar. Nuk mund ta mbyll pa i bërë një kompliment mikut tonë turk për shqipen e tij të “kolauduar”, me minimum rreziku. E meriton pajisjen me pasaportë, me një ceremoni dhe me një certifikatë mirënjohjeje për shqipen e pastër. Ju faleminderit”, u shpreh Edi Rama.