Nga Ismail Qemali tek Edi Rama, Qafoku tregon pse vendosi të shkruajë vetë historinë e 33 kryeministrave të Shqipërisë

“Historia e 33 kryeministrave të Shqipërisë, nga Ismail Qemali tek Edi Rama”, libri i gazetarit Roland Qafoku mblodhi pasditen e sotme në ambientet e Muzeut Historik Kombëtar personalitete të njohur nga bota politike, akademike, e gazetarisë por dhe më tej.

“Është një enciklopedi e vërtetë dhe një nga ato librat që do i rezistojë kohës. Sepse aty është historia në sfond. Por është më shumë se një libër historik, aty është politologjia. Nuk ka pikë ideologjie. Ka shkruajtur me ndjenja por pa emocion” vlerësoi profesor Artan Fuga

Drejtuesi i shtëpisë botuese “Onufri” Bujar Hudhri u shpreh i sigurtë se asnjë historian nuk do ta bënte këtë libër sepse duhej të ishte i pavarur por “sot për sot nuk ka historianë të pavarur, por ka gazetarë të pavarur. Mund të jetë i vetmi libër shqiptar ku urrejtja nuk duket kund, përkundrazi është respekti dhe vlerësimi”

“Pasi kërkova një libër me historinë e kryeministrave të Shqipërisë dhe nuk e gjeta, vendosa ta shkruaj vetë këtë libër. Tani që kanë kaluar 11 vjet nga vendimi që mora për ta shkruar këtë libër, nga studime me arkiva, me libra të vjetër, të rinj, dëshmi, intervista e foto, them se tani i njoh mirë të 33 kryeministrat e shtetit shqiptar. Mes tyre ka themelues e burra shteti, dhe politikanë e burokratë tipikë që i shërbyen këtij shteti por them se mes 33 kryeministrave ka dhe nga ata që nuk ishin ëngjëj të pafajshëm” tha autori i këtij libri gazetari i njohur Roland Qafoku

Libri vjen pas 11 vitesh punë dhe kërkime në arkiva e në botime të rralla të autorit.

Libri do t’u shërbejë më së shumti nxënësve e studentëve, por njëherësh do të nxisë interesa e vëmendje për anë të panjohura të personalitetit të 33 kryeministrave shqiptarë: prej kontributeve të heshtura deri tek lektisjet e flirtet, prej ambicjeve të parealizuara deri tek idetë që mund të evokohen në çdo kohë.