Nga kabineti i BKH-së në krye të Burgjeve, karriera e drejtueses së re. E para grua në këtë detyrë

Sadleva Bodo është emëruar në krye të Drejtorisë së Përgjithshme të Burgjeve, pas dorëheqjes së Adriatik Kupit. Ky i fundit e mori detyrën më 1 prill, por njoftoi largimin përmes një postimi në Facebook, duke e cilësuar drejtimin e institucionit si një periudhë të vështirë. Ai përmendi edhe kritikat dhe kundërshtimet e hasura gjatë ushtrimit të detyrës, pa dhënë detaje mbi arsyet e dorëheqjes. Ministri i Drejtësisë, Toni Gogu, konfirmoi pranimin e dorëheqjes dhe bëri me dije se procedurat për emërimin e drejtuesit të ri do të ndiqen në përputhje me ligjin.

Bodo vjen nga Byroja Kombëtare e Hetimit, ku prej pesë vitesh ka mbajtur pozicionin e këshilltares ligjore të drejtorit të këtij institucioni. Ajo ka punuar me Aida Hajnajn dhe më pas ka vijuar të ushtrojë të njëjtën detyrë edhe nën drejtimin e Joni Ketës. Ajo ka mbajtur një pozicion të rëndësishëm në Ministrinë e Brendshme, në periudhën kur ky institucion drejtohej edhe nga Fatmir Xhafaj.

Sipas jetëshkrimit të publikuar në faqen zyrtare të SPAK, nga maji 2018 deri në gusht 2021, Bodo ka qenë drejtoreshë e Drejtorisë së Integrimit Europian, Koordinimit, Marrëveshjeve Ndërkombëtare dhe Asistencës në Ministrinë e Brendshme. Pas largimit nga Ministria e Brendshme në gusht 2021, Bodo kaloi në Byronë Kombëtare të Hetimit, ku ka qëndruar deri tani.

Përzgjedhja e saj shënon kalimin e një juristeje nga kabineti drejtues i BKH-së në administrimin e sistemit penitenciar, një prej sektorëve më të ndjeshëm të Ministrisë së Drejtësisë. E lindur më 29 janar 1988, Bodo është diplomuar në Fakultetin e Drejtësisë të Universitetit të Tiranës në vitin 2010. Më pas ka ndjekur studime pasuniversitare në Wayne State University në Detroit, SHBA, dhe në Universitetin e Maastricht-it në Holandë.

Prej dhjetorit 2022, sipas CV-së zyrtare, ajo është edhe anëtare e Dhomës Kombëtare të Zgjidhjes së Konflikteve pranë Federatës Shqiptare të Futbollit. Sadleva Bodo pritet ta marrë zyrtarisht detyrën të mërkurën, më 14 tetor, duke u vendosur në krye të Drejtorisë së Përgjithshme të Burgjeve pas dorëheqjes së Adriatik Kupit.