Presidenti i Shteteve të Bashkuara, Donald Trump, e ka përfshirë sërish Kosovën dhe Serbinë në diskutimet e tij për konfliktet ndërkombëtare, gjatë fjalimit të mbajtur në Asamblenë e Përgjithshme të Kombeve të Bashkuara. Duke folur para liderëve botërorë, Trump e renditi tensionin mes Kosovës dhe Serbisë ndër tetë konfliktet që administrata amerikane ka arritur t’i zgjidhë ose të parandalojë përshkallëzimin e tyre. Ai e përshkroi angazhimin diplomatik të SHBA-së si një arritje të rëndësishme të administratës së tij.
Në listën e konflikteve të përmendura nga presidenti amerikan ishin edhe përplasjet Izrael-Hamas, Izrael-Iran, Egjipt-Etiopi, Indi-Pakistan, Ruandë-Kongo, Armeni-Azerbajxhan dhe Kamboxhia-Tajlandë. Trump tha se përpjekjet diplomatike amerikane janë vlerësuar nga liderët e vendeve të përfshira dhe se, sipas tij, pothuajse të gjithë i kanë dërguar letra falënderimi.
“Pothuajse secili prej këtyre vendeve më shkroi një letër falënderimi”, deklaroi ai gjatë fjalimit. Në vijim, Trump përmendi edhe konfliktin Indi–Pakistan, duke thënë se kryeministri pakistanez i kishte komunikuar personalisht se ndërhyrja diplomatike amerikane kishte kontribuar në shpëtimin e më shumë se 30 milionë jetëve. Sa i përket Kosovës dhe Serbisë, presidenti amerikan e paraqiti angazhimin e Uashingtonit si një përpjekje për të shmangur përshkallëzimin e tensioneve dhe për të ruajtur stabilitetin në Ballkanin Perëndimor.
Konfliktet që Trump deklaron se i ka zgjidhur gjatë mandatit të tij përfshijnë:
-Serbi-Kosovë
-Izrael-Hamas
-Izrael-Iran
-Egjipt-Etiopi
-Indi-Pakistan
-Ruandë-Kongo
-Armeni-Azerbajxhan
-Kamboxhia-Tajlandë