Nga Spanja ekstradohet 26-vjeçari shqiptar, i shpallur në kërkim prej vitit 2023

Si rezultat i bashkëpunimit të ngushtë mes Interpol Tiranës dhe autoriteteve spanjolle, në kuadër të operacionit policor të koduar “The Wanted”, është finalizuar ekstradimi nga Spanja drejt Shqipërisë i shtetasit shqiptar Algert Zeneli, 26 vjeç, banues në Milot.

Ky shtetas ishte shpallur në kërkim ndërkombëtar që prej vitit 2023, pasi ndaj tij Gjykata e Shkallës së Parë të Juridiksionit të Përgjithshëm në Shkodër kishte caktuar masën e sigurisë “Arrest në burg”. Ai akuzohet për disa vepra të rënda penale, përfshirë “kultivimin e bimëve narkotike”, “prodhimin dhe shitjen e lëndëve narkotike”, si dhe për pjesëmarrje në “grup të strukturuar kriminal” dhe “vepra të kryera nga organizata kriminale”.

Sipas të dhënave hetimore, dyshohet se gjatë vitit 2023, në zonën e fshatit Kir, në Njësinë Administrative Pult, si dhe në disa zona të tjera pranë Thethit në qarkun e Shkodrës, ky shtetas, në bashkëpunim me persona të tjerë të një grupi kriminal, ka qenë i përfshirë në kultivimin e rreth 10 900 bimëve të dyshuara narkotike të llojit Cannabis Sativa.

Operacioni për kapjen dhe ekstradimin e tij është realizuar falë shkëmbimit të informacionit dhe koordinimit të vazhdueshëm mes Interpol Tiranës dhe Interpol Madridit, duke bërë të mundur lokalizimin e tij në Spanjë, ndalimin dhe më pas transferimin drejt Shqipërisë për t’u përballur me drejtësinë.