Nga: Redjon Shtylla
Heronjtë nuk janë vetëm në filmat vizatimorë, por përgjatë 2021 u njohën me heroin më të madh të Shqipërisë. Arjan Sala, u fut mes flakëve dhe shpëtoi 25 jetë, por humbi dhe u shua. Sipas familjarëve dhe punonjësve, Arjani ishte i pari që vrapoi për të nxjerrë jashtë punonjësit e magazinës në qenrën tregtare “Casa Italia”.
Ai u përpoq me sa mundi më pas për të shuar flakët që sa vinin edhe shtoheshin. Trupi i pajetë u gjet tre ditë pas shpërthimit të flakëve, në një kohë që plaga e familjes ishte e madhe. Sipas analizave, një shkëndijë elektrike shkaktoi zjarrin e madh. Referuar ekspertizës, shkëndija elektrike ishte në një neon në garazhin që përdorej si magazinë.
Flakët u përhapën me shpejtësi kjo për shkak të materialeve lehtësisht të djegshme. Pas ngjarjes Sala u shpall “Dëshmor i Atdheut”. Statusi i lartë që mban motivacionin “Humbi jetën në përpjekje për të shpëtuar popullsinë në rast fatkeqësie”, iu dorëzua familjarëve nga kryeministri Edi Rama. Presidenti i Republikës, Ilir Meta po ashtu vlerësoi me “Dekoratën e Artë të Shqiponjës”, heroin Arjan Sala (pas vdekjes).
Kreu i Shtetit i akordoi dekoratën e lartë me motivacionin: Në shenjë vlerësimi e respekti të thellë për heroizmin e pashoq në përmbushjen e detyrës për të shpëtuar jetën e shumë qytetarëve. Për sakrificën dhe vetëflijimin e tij sublim, me të cilat ai hyri në zemrat tona, si shembull i heroizmit dhe humanizmit.
Kryetari i Bashkisë së Tiranës, Erion Veliaj mirëpriti në zyrën e tij familjarë të “Dëshmorit të Atdheut”, të cilëve u dorëzoi në mënyrë simbolike një kopje të tabelës së rrugës që do mbajë emrin e të ndjerit. Mes shumë emocionesh, kryebashkiaku Veliaj u shpreh se shumë vajza e djem, jo vetëm në Shqipëri, por edhe në Kosovë e Maqedoni, janë frymëzuar nga gjesti i heroit Arjan Sala. Rruga që mban emrin “Arjan Sala” ndodhet pranë Spitalit Ushtarak në Laprakë, në Njësinë 11.