Nis në Elbasan nisma për mbledhjen e tapave plastike, në fokus mjedisi dhe ndihma sociale

Në Elbasan ka nisur një iniciativë e re mjedisore, e ndërmarrë nga të rinjtë e qytetit në bashkëpunim me Drejtorinë e Mjedisit pranë Bashkisë.
Nisma, e cila konsiston në mbledhjen e tapave plastike, synon reduktimin e ndotjes, rritjen e ndërgjegjësimit qytetar dhe përmirësimin e hapësirave publike.

Drejtoresha e Mjedisit në Bashkinë Elbasan, Lorena Haxhiymeri, u shpreh se kjo iniciativë është një hap konkret drejt një qyteti më të pastër dhe më të ndërgjegjshëm.
“Është një nismë e thjeshtë, por me ndikim të madh. Përmes angazhimit të të rinjve dhe komunitetit, ne synojmë jo vetëm të reduktojmë mbetjet plastike, por edhe të krijojmë një kulturë të re qytetare,” u shpreh Haxhiymeri.

Ajo theksoi se përtej aspektit mjedisor, kjo nismë ka edhe një dimension social, pasi tapat e mbledhura do të shërbejnë për të ndihmuar në financimin e protezave dhe karrocave për persona me aftësi të kufizuara.

Nisma është konceptuar edhe si një garë pozitive mes shkollave, bizneseve dhe komunitetit, ku më aktivët do të vlerësohen me çmime simbolike dhe promovim publik.
Instalacioni për grumbullimin e tapave është vendosur tek Bahçja e Trëndafilave, një nga hapësirat më të frekuentuara të qytetit.

Sipas Bashkisë, grumbullimi i tapave do të bëhet çdo dy javë, ndërsa transportimi i tyre çdo muaj, me rezultatet që do të publikohen rregullisht.

Bashkia Elbasan i bën thirrje të gjitha shkollave, bizneseve dhe familjeve që t’i bashkohen kësaj nisme, duke kontribuar në një qytet më të pastër dhe më solidar.