ë tjera detaje janë zbardhur nga ngjarja e rëndë që ndodhi sot në rrugën “Petrela”, në Bathore të Kamzës, ku një efektiv i Policisë Ushtarake ka vrarë me armë zjarri dy vëllezër dhe të tretin e ka lënë të plagosur rëndë.
Mësohet se tre vëllezërit dhe efektivi N. Manzi ishin fqinjë, ndërsa shkak për sherrin që nisi sot dhe degradoi në krim dyshohet se është bërë një mur rrethues në oborrin e banesave të vëllezërve.
Tre vëllezërit janë me origjinë nga Tropoja, ndërsa autori është nga Tirana. Pasi është arrestuar, ky i fundit nuk ka bërë asnjë deklaratë për krimin e rëndë, të cilin e kreu me armën e shërbimit.
Viktima kanë mbetur S. Islamaj, rreth 30 vjeç, dhe N. Islamaj, rreth 48 vjeç, ndërsa i plagosur ka mbetur Sh. Ismailaj, rreth 44 vjeç.
Njoftimi i plotë i policisë:
Vrau me armë zjarri, për motive të dobëta, 2 shtetas dhe plagosi 1 tjetër, kapet dhe vihet në pranga autori i dyshuar.
Pas njoftimit të marrë për të shtëna me armë zjarri, në rrugën “Petrela”, në Bathore, shërbimet e Komisariatit të Policisë Nr. 5 shkuan menjëherë në vendngjarje.
Nga veprimet e para rezultoi se, gjatë një konflikti për motive të dobëta ndërmjet shtetasit N. M. dhe tre vëllezërve, S. I., N. I. dhe Sh. I., konflikti u përshkallëzua në përdorimin e armës së zjarrit. Si pasojë, shtetasi S. I., rreth 30 vjeç, humbi jetën, ndërsa shtetasit N. I., 48 vjeç, dhe Sh. I., rreth 44 vjeç, u plagosën dhe u transportuan për në spital, ku 48-vjeçari humbi jetën, ndërsa 44-vjeçari vijon të jetë në kujdesin e mjekëve.
Si rezultat i veprimeve të shpejta policore, u kap dhe u arrestua autori i dyshuar i rastit, shtetasi N. M., rreth 40 vjeç, punonjës i Policisë Ushtarake.
Gjithashtu, u sekuestrua arma e zjarrit (pistoletë), e dyshuar e përdorur për krimin.
Grupi hetimor po vijon punën për dokumentimin e plotë ligjor të ngjarjes dhe sqarimin e rrethanave të saj.