Një supervullkan i fjetur në Itali po i afrohet shpërthimit

Një vullkan në Itali, i cili është shtëpia e gjysmë milioni njerëzve, po i afrohet më shumë shpërthimit, sipas një studimi të ri.

Sipas bashkautorit të studimit, Stefano Carlino, supervullkani Campi Flegrei pranë Napolit është në një gjendje “jashtëzakonisht të rrezikshme”.

Vullkani shpërtheu për herë të fundit në 1538, por tani është në një rrezik më të madh të shpërthimit se kurrë.

Autoritetet lokale kanë një plan evakuimi të përcaktuar dhe nivelet e rrezikut rishikohen çdo muaj.

A është i rrezikshëm vullkani Campi Flegrei?

Zona e Napolit në Itali mund të jetë më e famshme për vullkanin Vezuv, i cili zhduku qytetin e Pompeit në vitin 69 pas Krishtit, por vullkani Campi Flegrei është një shqetësim më aktual.

Rreth 30 mijë vjet më parë, vullkani mendohet të ketë kontribuar në zhdukjen e njeriut të Neandertalit.

Në vitin 1538, vullkani shpërtheu gjatë një periudhe prej tetë ditësh, duke nxjerrë jashtë mjaftueshëm lavë, shkëmbinj dhe re hiri për të formuar një mal të ri. Në vitet 1980, pati një rritje tjetër të aktivitetit që rezultoi në evakuimin e 40 mijë banorëve aty pranë.

Që atëherë, supervullkani ka qenë relativisht i qetë.

Tani, megjithatë, një studim nga studiues në Kolegjin Universitar të Londrës (UCL) dhe Instituti Kombëtar i Gjeofizikës dhe Vullkanologjisë (INGV) në Itali ka zbuluar se një rizgjim mund të jetë i afërt.