Një tjetër hap përpara në shëndetësi, ndërhyrje moderne koronare në Spitalin Memorial Fier

Spitali Rajonal Memorial Fier ka shënuar një tjetër arritje në fushën e kardiologjisë, pas realizimit me sukses të një ndërhyrjeje komplekse koronare, e cila aplikohet për herë të parë në një spital publik në Shqipëri. Bëhet fjalë për procedurën koronare perkutane me qasje retrograde, e shoqëruar me teknikën e avancuar “reverse CART”.

Sipas njoftimit të Ministrisë së Shëndetësisë dhe Mirëqenies Sociale, ndërhyrja u krye te një pacient 72-vjeçar, i cili vuante nga një formë e rëndë dhe komplekse e sëmundjes së arterieve koronare, duke paraqitur një nivel të lartë rreziku.

Procedura u realizua nga mjeku kardiolog dr. Amarildo Voci, së bashku me ekipin e hemodinamikës së Spitalit Memorial Fier, pjesë e të cilit ishin dr. Ndriçim Kallashi, dr. Marsjon Qordja, dr. Briand Shehu dhe infermieri Ermir Tajari.

Ndërhyrjet koronare perkutane (PCI) kanë si qëllim hapjen e enëve të gjakut të zemrës që janë ngushtuar ose bllokuar, duke mundësuar rikthimin e furnizimit normal me gjak të muskulit të zemrës.

Teknika e përdorur në këtë rast, qasja retrograde dhe “reverse CART”, konsiderohet një metodë e avancuar që aplikohet në situata të ndërlikuara, kur ndërhyrjet standarde nuk janë të mjaftueshme. Ajo u jep mundësi mjekëve të trajtojnë raste të vështira të sëmundjeve koronare dhe të ofrojnë alternativa të reja për pacientët me risk të lartë.