Njihen sot me akuzat, Tom Doshi shkon në prokurori, Mark Frroku në spital
Deputeti Tom Doshi është paraqitur sot rreth orës 10.00 në ambientet e Prokurorisë së Përgjithshme, duke e vizituar atë vetëm dy ditë pas lirimit nga arresti shtëpiak. Mësohet se Doshit do t’i komunikohet zyrtarisht akuza nga përfaqësuesit e prokurorisë. Deputeti Tom Doshi akuzohet për kallzim të rremë, kanosje dhe deklarim të rremë para prokurorit lidhur me pretendimet për vrasjen e tij e të një deputeti tjetër, Mhill Fufi, me porosi të Ilir Metës.
Pas qëndrimit për gati një muaj në arrest shtëpie, deputeti Doshi është lënë tashmë i lirë nga Gjykata e Lartë, me të drejtë paraqitje në prokurori.
Por, edhe sot rreth orës 11.00 është lajmëruar edhe deputeti tjetër demokristian, Mark Frroku që do të njihet me akuzat nga prokuroria. Frroku ndodhet nën masën e arrestit me burg, por për shkaqe shëndetësore është i shtruar prej disa ditëve në spital. Atij do t’i komunikohet akuza për të njëjtën çështje nga prokurorët ne spitalin privat, ku edhe do të njihet me mbylljen e hetimit.