Kuvendi po shqyrton disa ndryshime dhe shtesa në ligjin “Për administrimin e objekteve të konfiskuara si ndërtime pa leje, me qëllim përdorimin e tyre për interes publik apo strehim social, si dhe zbutjen e pasojave sociale të shkaktuara”.
Projektligji synon modernizimin, qartësimin dhe unifikimin e procedurave për administrimin, zhvillimin, përdorimin dhe shitjen e objekteve të konfiskuara.
Po ashtu, synohet kalimi nga një model i shpërndarë kompetencash në një model të centralizuar pranë Agjencisë së Administrimit të Pasurive të Sekuestruara dhe të Konfiskuara (AAPSK), e cila do të ketë rolin e organit unik përgjegjës për administrimin dhe zhvillimin e këtyre objekteve.
Një tjetër ndryshim lidhet me objektet e konfiskuara ku investimi ka mbetur i papërfunduar. Projektligji parashikon procedura për vlerësimin e tyre, përcaktimin e kostove të punimeve që kanë mbetur dhe përgjegjësitë e subjekteve zhvilluese.
Për përfundimin e këtyre ndërtimeve, operatorët ekonomikë do të përzgjidhen përmes procedurave të prokurimit publik. Autoriteti kontraktor që do të realizojë prokurimin, mbikëqyrjen, përfundimin dhe kolaudimin e punimeve do të caktohet rast pas rasti me vendim të Këshillit të Ministrave.
Objektet e konfiskuara mund të përdoren edhe për strehim social ose për interes publik. Projektligji përcakton procedurat për kalimin e tyre në pronësi, përdorim apo administrim të institucioneve publike dhe njësive të vetëqeverisjes vendore.
Ndryshimet prekin edhe pronarët e truallit dhe personat e tretë që kanë marrëdhënie kontraktuale me subjektet ndërtuese. Për personat e tretë parashikohet njohja e marrëdhënieve kontraktuale, procedura për kompensimin financiar, trajtimi i kontratave të kleringut dhe mundësia e pjesëmarrjes në procedurat e shitjes së objekteve të konfiskuara.
Projektligji përcakton gjithashtu përgjegjësi ligjore dhe financiare për subjektet zhvilluese, zbatuese, mbikëqyrëse ose kolauduese edhe pas konfiskimit të objektit, përfshirë detyrimet që lidhen me përfundimin e punimeve të mbetura.
Ndër objektivat e projektligjit është edhe krijimi i një grupi të përhershëm pune me karakter teknik, garantimi i transparencës, si dhe thjeshtimi i procedurave për vlerësimin, zhvillimin dhe pajisjen me leje ndërtimi.
Projektligji parashikon gjithashtu sigurimin e financimit të qëndrueshëm përmes një fondi të veçantë ose të dedikuar për ndërtimet pa leje, si dhe masa për mbrojtjen e të drejtave të pronarëve të truallit dhe personave të tretë.
Sipas relacionit, të gjitha këto masa do të lejojnë rikthimin më të shpejtë të pasurive të fituara në mënyrë të paligjshme në komunitet, në një mënyrë transparente dhe të qëndrueshme.
Projektligji synon gjithashtu të reduktojë burokracinë në administrimin e objekteve të konfiskuara, të përmirësojë menaxhimin e tyre dhe të gjenerojë të ardhura shtesë nga qiratë, në rast se kjo formë përdorimi zgjidhet duke shmangur gjithashtu amortizimin e objekteve.
Këto objektiva kanë për qëllim të krijojnë një sistem më të mirë administrimi të pasurive të sekuestruara dhe të konfiskuara, duke forcuar mbrojtjen e interesit publik dhe duke rikthyer përfitimet në komunitet në mënyra të ndryshme.
Ndryshimet nw ligj hapin një periudhë tranzitore 6-mujore për vetëdeklarimin e ndërtimeve pa leje.
Sipas propozimit, subjektet poseduese që deklarojnë me vullnetin e tyre pranë Agjencisë së Zhvillimit të Territorit (AZHT) objektet e ndërtuara pa leje, brenda 6 muajve nga hyrja në fuqi e ligjit, do të përfitojnë të drejtën e parablerjes dhe do të kenë mundësi t’u nënshtrohen procedurave përkatëse.
Ndryshimet parashikojnë gjithashtu krijimin e një regjistri transparent të objekteve të konfiskuara, ndërsa AAPSK do të ketë kompetenca për administrimin, zhvillimin, shitjen dhe monitorimin e tyre.