“Paketa e Maleve”, Rama: Fokus te turizmi dhe jo izolimi i natyrës

Kryeministri Rama ka reaguar sërish në rrjetet sociale, në Facebook, për “Paketën e Maleve”, duke nënvizuar rëndësinë e zhvillimit turistik dhe ekonomik në zonat malore.

Ai është ndalur tek debati mbi pronësinë dhe mungesën e certifikatave të tokës për shumë familje që nuk e kanë pranuar ligjin 7501, duke argumentuar se kjo situatë i pengon qytetarët të përfitojnë leje ndërtimi, subvencione shtetërore, financime nga BE apo kredi bankare.

Sipas tij, “Paketa e Maleve” synon të mbyllë këtë boshllëk ligjor dhe të krijojë mundësi për zhvillim, duke lehtësuar investimet, veçanërisht nga emigrantët që duan të investojnë në zonat e tyre të origjinës. Rama shton se kjo nismë do të ndihmojë në futjen e kapitalit privat në ekonominë malore dhe në nxitjen e turizmit të qëndrueshëm.

Ai ka ironizuar gjithashtu kritikët e projektit, duke përmendur debatin për zonat e mbrojtura dhe duke e quajtur të ekzagjeruar kundërshtimin ndaj nismës. Në këtë kontekst, Rama sjell shembullin e Austrisë, duke theksuar se në Alpet austriake zhvillimi turistik dhe mbrojtja e natyrës bashkëjetojnë përmes rregullave të qarta dhe investimeve të kontrolluara.

Sipas tij, rajone si Tirol dhe Kitzbühel tregojnë se një model i suksesshëm turizmi malor mund të sjellë të ardhura të larta dhe njëkohësisht të ruajë standarde të larta mjedisore. Ai nënvizon se peizazhi nuk duhet parë si pengesë për zhvillimin, por si bazë për të ndërtuar një ekonomi të fortë turistike.

Në përfundim, Rama thekson se natyra dhe zhvillimi mund të bashkëjetojnë nëse ka vizion dhe disiplinë, duke shtuar se qëllimi është që Shqipëria të zhvillojë një turizëm cilësor dhe me vlerë të lartë ekonomike, pa e izoluar natyrën, por duke e kthyer atë në pjesë të ekonomisë së vendit.