Kryeministri Edi Rama ka reaguar ndaj kritikave për “Paketën e Maleve”, duke pretenduar se shumica e kundërshtarëve në rrjetet sociale nuk janë përdorues realë, por profile të rreme të lidhura me opozitën.
Rama deklaron se “90% e tyre janë vërtet profile fallco”, duke shtuar se pas tyre qëndrojnë përfaqësues të opozitave parlamentare dhe atyre që ai i cilëson si “opozita imagjinare”. Kreu i qeverisë i akuzon kundërshtarët për përdorimin e gjuhës së urrejtjes dhe fyerjeve, duke thënë se debati publik është degraduar në ofendime dhe mallkime.
”Lexoni ARGUMENTAT E KUNDËRSHTARËVE TË PAKETËS SË MALEVE dhe kini parasysh se 90% e tyre janë vërtetë profile fallco, po mbas atyre profile qëndrojnë pikërisht sorrat e opozitave parlamentare dhe korbat e opozitave imagjinare, të cilat e shndërruan Bulevardin e Flamingove në Sheshpërsheshin e Vulgaritetit, ku jashtënxirret llumi i gjuhës së urrejtjes me sasira e ndotësira që ai bulevard s’i kishte parë as kur nxirrte gjuhën mbi të Ndotësi i Madh i mexhelisit tonë. Shikojeni se si i shajnë, mallkojnë, ofendojnë gjithë ata burra sot në Theth dhe mendojeni vetëm për një sekondë, që këta shpirtra të bardhë si sytë e sorrës dhe pendët e korbit, të kenë në dorë fatin e Shqipërisë”,-shkruan Rama.
