”Paketa e Maleve”, shpallen zonat me përparësi në katër bashki

Këshilli i Ministrave ka miratuar këtë të premte vendime për shpalljen e disa zonave si “Zona me përparësi zhvillimin e ekonomisë malore” në territorin e bashkive Devoll, Kolonjë, Malësi e Madhe dhe Patos, në kuadër të zbatimit të ligjit “Për paketën e maleve”.

Sipas vendimeve, në Bashkinë Devoll shpallen dy zona kryesore që përfshijnë një numër të madh fshatrash në njësitë administrative Miras, Hoçisht dhe Progër, si dhe Progër dhe Qendër Bilisht, me një sipërfaqe totale prej mbi 17 mijë hektarësh. Në Bashkinë Kolonjë, janë përcaktuar shtatë zona të ndryshme në njësitë administrative Qendër Leskovik, Barmash, Qendër Ersekë, Mollas dhe Çlirim.

Në Bashkinë Malësi e Madhe, vendimi përfshin dhjetë zona të shpërndara në Kastrat, Kelmend, Shkrel, Gruemirë dhe Koplik, përfshirë edhe një zonë të gjerë në Vermosh, Lëpushë dhe Bogë, me sipërfaqe të konsiderueshme për zhvillim ekonomik, industrial dhe turistik.

Në Bashkinë Patos janë shpallur pesë zona në njësitë administrative Patos dhe Ruzhdie, të cilat gjithashtu do të trajtohen si zona prioritare zhvillimi. Në të gjitha vendimet përcaktohet se kufijtë, shtrirja dhe pikat e hyrjes e daljes së zonave janë të përcaktuara sipas hartave zyrtare në sistemin KRGJSH. Aktivitetet e lejuara përfshijnë zhvillimin ekonomik, industrial dhe turistik.