Papa Leoni XIV: Shpirti Shenjt haptë shtigje pajtimi, ndriçoftë mendjen e qeveritarëve

Në Mbretrëreshën Qiellore, ditën e Rrëshajëve, Leoni XIV lutet për dhuratën e paqes: “Vetëm një zemër paqësore mund të përhapë paqen, në familje, në shoqëri, në marrëdhëniet ndërkombëtare”. Papa kërkon “guxim” për politikanët, që të “bëjnë gjeste pajtimi e dialogu”. Pastaj, mendimi shkon tek të rinjtë, studentët dhe mësuesit, “sidomos tek ata që ditët e ardhshme do të japin provimet, në përfundim të ciklit të studimeve”

“Para se ta përfundoj këtë kremtim, ju shpreh përshëndetjen time të përzemërt ju të gjithëve, që morët pjesë, si dhe atyre që u lidhën nëpërmjet medias. Falënderoj kardinalët dhe ipeshkvijtë e pranishëm dhe të gjithë përfaqësuesit e shoqatave dhe lëvizjeve kishtare dhe të bashkësive të reja. Të dashur motra dhe vëllezër, me forcën e Shpirtit Shenjt, nisuni të përtërirë nga ky Jubile juaji. Shkoni dhe çojani të gjithëve shpresën e Zotit Jezus!” Kështu pohoi Papa Leoni XIV në lutjen e Mbretëreshës Qiellore, në përfundim të meshës së kremtuar në Vatikan, në solemnitetin e Rrëshajëve.

Në Itali dhe në vende të tjera, kujtoi ai, viti shkollor po mbaron këto ditë. Do të doja t’i përshëndesja të gjithë nxënësit dhe mësuesit, veçanërisht ata që do të japin provime gjatë ditëve në vijim, në fund të mësimeve të tyre.

E tani, me ndërmjetësimin e Virgjërës Mari, ta kërkojmë nga Shpirti Shenjt dhuratën e paqes.

Para së gjithash, paqe në zemra: vetëm një zemër e qetë mund të përhapë paqen, në familje, në shoqëri, në marrëdhëniet ndërkombëtare. Shpirti i Krishtit të Ngjallur haptë shtigje pajtimi kudo që ka luftë:

…ndriçojini sundimtarët dhe jepjuni atyre guximin të bëjnë gjeste të uljes së tensioneve dhe dialogut.
R.SH. – Vatikan