Papa Leoni XIV: Të mos i harrojmë ata që vuajnë e vdesin për shkak të konflikteve

Në Castel Gandolfo, ku po kalon një periudhë pushimi, të ndërprerë vetëm nga disa ngjarje publike dhe nga lutja e Engjëllit të Tënzot e së dielës, Papa Leoni XIV, pas lutjes së sotme mariane, kujtoi përsëri konfliktet e shumta, që ende vazhdojnë në mbarë botën.

Ne vazhdojmë të ndjekim me shqetësim atë që po ndodh në vende të ndryshme të shkatërruara nga lufta dhe nga dhuna. Të mos i harrojmë ata që vuajnë dhe vdesin për shkak të konfliktevev e, me angazhimin tonë bujar për paqen, të bashkohemi edhe ne me lutjen tonë të vazhdueshme.

Lajme për viktima në Ukrainë dhe sulme të reja në Iran dhe Kuvajt
Edhe sot ndjehen lajme për viktima në konfliktin e Ukrainës, me kryeqytetin Kiev të goditur nga një sulm masiv me raketa ruse, që thuhet se la përsëri pas një të vdekur dhe dhjetëra të plagosur. Ndërkohë, ushtria ukrainase mori përgjegjësinë për operacionet kundër objektivave ushtarake ruse në Detin e Zi dhe Detin Azov. Flitet edhe për bombardime të reja amerikane në Iranin jugor, ndërsa Teherani është përgjigjur me raketa dhe dronë kundër instalimeve ushtarake amerikane në Kuvajt. Edhe Kurdistani i Irakut është prekur. Uashingtoni e ka lidhur ofensivën e re me sulmin e së premtes së kaluar në bazën ajrore Muwaffaq al Salti në Jordani, i cili vrau dy ushtarë amerikanë dhe la një të tretë të zhdukur.

Përshëndetje banorëve të Castel Gandolfos dhe shtegtarëve
Papa Leoni XIV, më pas, ripohoi përshëndetjet dhe mirënjohjen e tij për të gjithë banorët e Castel Gandolfos dhe mirëpret me gëzim shtegtarët “që vijnë nga të katër anët e botës!”.

I drejtoi një përshëndetje të veçantë Komunitetit Cenacolo të Nënës Elvira, mbledhur në Saluzzo për Festën e Jetës; Lëvizjes së Familjeve të Reja Focolare, të mbledhura për Shkollën ndërkombëtare; studentëve meksikanë që marrin pjesë në Shkollën Verore APRA dhe grupit të Fellowship-it Katolik të Botëkuptimit.

Në anglisht Papa përshëndeti më pas anëtarët e rinj të Regnum Christi, të cilët po marrin pjesë në një kurs ndërkombëtar për formuesit, dhe australianët që marrin pjesë në “Shtegtimi i Luanit”, të shoqëruar nga Ipeshkvi-ndihmës Anthony Percy i Sidneit. Së fundi, Papa përshëndeti familjet dhe fëmijët e Motrave të Bamirësisë të Ngjitjes së Zojës në Qiell, të Romës, të rinjtë nga famullia e Shën Shëlbuesit në Jeruzalem, Grupin e të Rinjve nga famullia e Shën Augustinit të Bovolentas dhe shtegtarët nga Akademia Liturgjike e Rzeszów.

Vatican News