Parku multifunksional “Dua të Luaj” në Elbasan është gati dhe shumë shpejt do të jetë i aksesueshëm për qytetarët, duke sjellë një hapësirë të re rekreative, sportive dhe të gjelbër në qytet.
I shtrirë në rreth 22 mijë metra katrorë, parku është konceptuar si një hapësirë për të gjitha grupmoshat, ku sporti, argëtimi dhe qëndrimi në natyrë ndërthuren në një mjedis të përbashkët për komunitetin.
Parku përfshin fusha të ndryshme sportive, pista për vrapim dhe biçikleta, kënde lojërash për fëmijët, hapësira të gjelbra dhe ambiente rekreative.
Kompleksi përfshin edhe terrene për futboll, basketboll, tenis dhe padel, ndërsa pista e vrapimit është rreth 430 metra e gjatë.
Një tjetër element i rëndësishëm është krijimi i hapësirave për pushim dhe rekreacion, duke e bërë parkun një destinacion jo vetëm për fëmijët dhe të rinjtë, por edhe për familjet dhe të moshuarit.
“Dua të Luaj” është ndërtuar në një hapësirë që për vite me radhë kishte mbetur e degraduar, duke e transformuar atë në një zonë moderne dhe të aksesueshme për komunitetin. Investimi është realizuar përmes Fondit Shqiptar të Zhvillimit.
Me përfundimin e punimeve, Elbasani fiton një tjetër hapësirë publike ku qytetarët mund të ushtrojnë aktivitet fizik, fëmijët të luajnë dhe familjet të kalojnë kohë së bashku, në një mjedis të gjelbër dhe të përshtatshëm për aktivitete të ndryshme.
Parku “Dua të Luaj” synon të kthehet kështu në një pikë të re takimi për qytetarët e Elbasanit dhe në një prej hapësirave më të rëndësishme publike për sportin, rekreacionin dhe argëtimin në qytet.
