Peka: Të sqarohet nëse McGonigal ka rol në mbështetjen ndaj Vlora Hysenit në SHISH

Ish-zv/ministri i Brendshëm, Avenir Peka, ka ngritur pikëpyetje mbi rastin e ish-drejtoreshës së SHISH, Vlora Hyseni, duke kërkuar që të sqarohet nëse ish-agjenti i FBI-së, Charles McGonigal, ka pasur ndonjë rol në mbështetjen apo sponsorizimin e saj. Peka e lidh këtë çështje me rolin e Florian Coldeas dhe marrëdhëniet e tij me strukturat e sigurisë në Shqipëri.

Sipas Pekës, Coldea, të cilin ai e cilëson si “krahun e djathtë të McGonigal në Europë” dhe si bashkëpunëtor të ngushtë të Oleg Deripaskës, jo vetëm që është emëruar këshilltar për sigurinë kombëtare, por, sipas tij, ka pasur edhe zyrë në SHISH.

“Askush s’e di nëse e ka marrë certifikatën e sigurisë apo s’e ka marrë. Ka përfituar nga programi i Charles McGonigal, që na çon te pikëpyetja tjetër: A është McGonigal sponsorizues i Vlora Hysenit apo jo?!”, u shpreh Peka në ”A2cnn”.

Duke i parë këto zhvillime në tërësi, Peka argumenton se bëhet fjalë për një zinxhir veprimesh që nuk mund të shpjegohet thjesht si rastësi dhe e lidh atë me rolin e kryeministrit Edi Rama. “Kur i merr të gjitha këto bashkë, e kupton që s’është rastësi. Atë programin, dizajnimin, e bën vetëm kryeministri”, përfundoi ai.