Për herë të parë shifrat zyrtare, sa gazetarë janë në Shqipëri

Dy përfaqësuesit e lartë drejtues të Unionit të Gazetarëve Shqiptarë(UGSH), përkatësisht kryetari Aleksandër Çipa dhe sekretari i Përgjithshëm Xhovan Shyti, kanë qenë paraditen e sotme përpara deputëtëve të Komisionit parlamentar të Medias për të dhenë një tablo të situatës sociale në të cilën e ushtrojnë veprimtarinë e tyre punonjësit e pushtetit të katërt.

Në skenën mediatike të vendit aktualisht gjenden të punësuar mbi 5700 punonjës, nga të cilët mbi 2300 janë gazetarë që punojnë në të gjitha strukturat redaksionale të mediave. Rreth 1290 gazetarë kanë mbi katër vjet marrëdhënie pa shkëputje nga puna…”.

Me këto të dhena e ka nisur fjalën e vet referuese kryetari i UGSH, Aleksandër Çipa, duke sjellë për të parën herë para deputetëve të Komisionit shifra e fakte konkrete.

Sipas Çipës në mediat audiovizive aktualisht janë të punësuar mbi 3700 punonjës në krejt vendin, në 72 televizione, në 72 radio dhe 3 platforma digitale. Në shtypin e shkruar gjenden të punësuar rreth 670 punonjës, ndërkohë që në 600 mediat on-line janë të punësuar rreth 980 persona.

Pas këtyre të dhenave Çipa ka hyrë në të ashtuquajturën “zona e zezë” e medias, duke tërhequr vëmendjen e deputetëve të pranishëm.

“Sistemi i pagave në media funksionon në mënyrë të çrregullt. Nuk ka respektim të afateve kohore të dhënies së tyre dhe nuk respektohen kriteret e parashikuara në legjislacion, në Kodin e Punës. Unioni i Gazetareve Shqiptare ka konstatuar se gjatë vitit 2015 në mbi 95% të të gjitha mediave ka pasur vonesa të dhënies së pagave mujore, duke cënuar periodicitetin kohor. Në mbi 30 % të tyre këto vonesa shkojnë deri në 3 e 4 muaj.

Pagat fiksohen nga pronarët dhe administratorët, pa patur një proces të rregullt negociues. Pagat më të mëdha kapin vlerën deri në 300 mijë lekë të reja, ndërsa minimalet shkojnë deri në 30 mijë lekë.

Kjo praktike mundëson fenomene diskriminuese dhe shpesh edhe konflikte administrative. Për kësi shkaqesh gjate vitit 2015 ka pasur mbi 135 procese gjyqësore në Gjykatën e Tiranës…”.

Por zymtësia nuk përfundon këtu. Çipa ka sjellë të tjera statistika, të nxjerra nga monitorimi permanent që UGSH i bën situatës sociale të gazetarëve.

“Gjatë 5 viteve të fundit në asnjë prej mediave të vendit nuk është negociuar kontrata kolektive e gazetarit, ndërkohë që kontratat individuale nuk negociohen por përcaktohen falë vullnetit vetëvendosës të punëdhënësve… Për rreth 50 % të numrit të të gjithë punonjësve të mediave të vendit nuk ka derdhje kontributesh financiare për sigurimet shoqërore dhe ato shëndetësore të tyre dhe ky përbën një skandal. Skandal që UGSH e ka denoncuar kohë më parë…”, ka raportuar kreu i UGSH, i cili, pasi është falendëruar nga kreu i Komisionit parlamentar, Gënc Pollo dhe anëtarët, për panoramën e ofruar u është përgjigjur pyetjeve të parashtruara nga deputetët Fatmir Toçi, Alfred Peza, Mimoza Hafizi, Myqerem Tafaj etj.

Takimi i sotëm me drejtuesit e UGSH është vijim i planit të punës të Komisionit parlamentar të Medias. Në hapje të kësaj axhende parlamentare informuese, të ftuar në këtë Komision kanë qenë përfaqësues të BIRN, të cilët po ashtu kanë dhanë një pasqyrë të ngjashme lidhur me situatën e punonjësve të medias.

Në mbyllje të takimit Komisioni vendosi të realizojë të tilla edhe me pronarët e mediave, me përfaqësues zyrtarë të Tatim-Taksave, të Institutit të Sigurimeve Shoqërore e Inspektoriatit të Punës, madje edhe ballafaqime me grupet e interest.