Përdorimi i telefonit në timon, ja sa gjobiteni me Kodin e ri Rrugor

Aktualitet E Diel, 2 Maj 2021 03:03

Aksidentet rrugore shkaktohen nga faktorë të ndryshëm, e ku njëri prej tyre më problematiku është përdorimi i celularit gjatë kohës që drejton mjetin. Lidhur me këtë problem, gjobat për përdorimin e celularëvë në makinë do të jenë nga 5 mijë deri në 15 mijë lekë të reja.

Kështu është shprehur dhe ka konfirmuar sot eksperti i Policisë Rrugore, Ervin Dervishi. I ftuar në emisionin ‘Rreze dielli’ në Report Tv, ai u shpreh se propozimet për këto gjoba vijnë pas një studimi ku është konstatuar se përdoruesi i telefonit është 4 herë i rrezikuar vetë dhe gjithashtu përbën një rrezik akoma më të madh për kalimtarin dhe drejtuesit e tjerë të mjeteve.

Dervishi nënvizoi se pjesa më madhe e aksidenteve me pasoja të rënda për kalimtarët vijnë nga drejtues që përdorin vazhdimisht celularët duke drejtuar mjetin.

“Për këtë arsye kemi propozuar me ndryshimet e reja që po i bëhen Kodit Rrugor, ashpërsimin e masave ashtu sic kemi bërë dhe për rripin e sigurimit, duke rritur gjobën nga 5 deri 15 mijë lekë të reja. Gjithashtu kemi konstatuar se, aplikimi i këtij niveli gjobe për shkelësit e rripit të sigurimit ka bërë që sot, kemi një situatë shumë herë më të mirë ku 90% e drejtuesve përdorin rripin e sigurimit, nga 30% që ka qenë dikur”, tha Dervishi.