Plazhet e Durrësit pa vrojtues, prindërve u bëhet thirrje të mos i lënë fëmijët pa mbikëqyrje

Në kulmin e sezonit veror, mungesa e vrojtuesve të plazhit vijon të mbetet një nga shqetësimet kryesore në bregdetin e Vlorës, duke ngritur pikëpyetje për sigurinë e pushuesve.

Si në zonat publike, ashtu edhe në plazhet private, kullat e vrojtimit rezultojnë pa personel. Në shumë raste, ato janë kthyer në vende ku pushuesit pushojnë ose kërkojnë hije, ndërsa mungojnë personat e trajnuar që duhet të monitorojnë lëvizjet në det dhe të ndërhyjnë në rast emergjence.

Frekuentuesit e rregullt të plazhit, veçanërisht të moshuarit, shprehen të shqetësuar për këtë situatë dhe kërkojnë që masat e sigurisë të mos kufizohen vetëm te tabelat informuese, por të shoqërohen me praninë e vrojtuesve të certifikuar përgjatë vijës bregdetare.

Sipas tyre, prania e rojeve të plazhit është thelbësore, sidomos gjatë muajve të verës kur numri i pushuesve rritet ndjeshëm dhe rreziku për incidente në det bëhet më i madh.

Problemi nuk është i ri. Mungesa e vrojtuesve është konstatuar edhe në sezonet e mëparshme, pavarësisht se legjislacioni në fuqi detyron stacionet e plazhit të kenë personel të trajnuar për garantimin e sigurisë së pushuesve.

Pushuesit u bëjnë apel autoriteteve dhe operatorëve të plazheve që të marrin masa konkrete për zbatimin e rregullave, në mënyrë që sezoni turistik të zhvillohet në kushte sa më të sigurta për të gjithë, veçanërisht për fëmijët dhe të moshuarit.