”Po përballem me ushtrinë e patronazhistëve”, Marjana Koçeku: Me e lanë mandatin e kam shumë të lehtë

Deputetja Marjana Koçeku ka reaguar publikisht ndaj asaj që e cilëson si një fushatë të organizuar presioni dhe denigrimi në rrjetet sociale, duke deklaruar se nuk do të heqë dorë nga mandati i saj për shkak të sulmeve online. Përmes një reagimi, Koçeku shprehet se prej disa ditësh po përballet me një “ushtri virtuale” patronazhistësh dhe profilesh të rreme, të cilët sipas saj i kërkojnë të lërë mandatin. Ajo thekson se dorëheqja do të ishte një veprim i lehtë, por se nuk është e gatshme t’i hapë rrugë, siç e përshkruan ajo, “së keqes” që sipas saj organizohet nga funksionarë të shtetit për të sulmuar zërat kritikë.

Postimi i plotë

Prej disa ditësh po përballem në rrjetet sociale me nji ushtri virtuale patronazhistësh e profilesh të rreme që më kërkojnë me e lanë mandatin. Me e lanë mandatin e kam shumë të lehtë. Por nuk jam mësue me i hapë rrugë të keqes, që ka marrë edhe formën e këtyne mercenarëve virtualë, të organizuem prej komandantëve të tyne – funksionarë të këtij shteti – për me përbaltë e me denigrue veç pse kam zgjedhë pavarësinë e përfaqësimit në parlament.

Thuhet se janë diku 800 mijë profile të tilla që qarkullojnë. Bashkitë janë kthye në garnizone të këtyne mercenarëve dhe ushtrojnë presion të përditshëm përmes fjalës nëpër komente e postime. Kurrë nuk asht keqpërdorë fjala ma shumë në historinë e demokracisë së këtij vendi. Dhe tash në kohë proteste vërehet mobilizimi total i tyne për me shkatërrue e denigrue çdokend që i del kritik qeverisë.

E kam ditë se çmimi i të folunit lirshëm ka me qenë i naltë, por heshtja do kishte kushtue shumë ma tepër në këtë republikë që kërkon me i luftue qytetarët e vet me fantazma, hije patronazhistësh dhe profile false. Kjo nuk duhet me qenë republika e fallsitetit dhe e fantazmave online.