Policia: Nuk po bllokojmë protestuesit

Pas deklaratave të opozitës se policia po bllokon qytetarët që të vijnë në Tiranë për të protestuar, Policia e Shtetit reagoi përmes një deklarate duke sqaruar se asnjë protestues nuk po pengohet.

 “Sqarojmë edhe një herë opinionin publik se nga strukturat e policisë së Shtetit nuk ka asnjë pengim apo bllokim të automjeteve që transportonin qytetarë drejt Tiranës”, thuhet në komunikatën e policisë.

Kryetari i Grupit Parlamentar të PD –së, Edi Paloka deklaroi paradite se policia po i pengon protestuesit me kontrolle e postblloqe.

Policia nga ana e saj sqaron se “strukturat policore po ushtrojnë kontrolle në akset rrugore, me qëllim identifikimin e kapjen e personave që mund të lëvizin me armë apo sende të tjera të kundraligjshme, apo që në bazë të të dhënave mund të synojnë akte të paligjshme gjatë protestës.”