Policia Rrugore e Gjirokastrës ka intensifikuar kontrollet në të gjitha akset rrugore të qarkut, duke përdorur dronë, radarë dhe makina inteligjente, me fokus parandalimin e aksidenteve dhe menaxhimin e trafikut gjatë sezonit veror.
Gjatë periudhës 24-31 gusht, kontrollet kanë çuar në procedimin penal të 4 drejtuesve të mjeteve për shkelje të rregullave të qarkullimit rrugor, ndërsa 18 leje drejtimi janë pezulluar. Në total, Policia Rrugore ka vendosur 1441 masa administrative për shkelje të ndryshme të Kodit Rrugor.
Njoftimi i policisë:
Policia Rrugore e Gjirokastrës/Monitorim intensiv me dron, radar dhe makina inteligjente në të gjitha akset e qarkut, për të parandaluar ngjarjet rrugore me pasoja, si dhe për të menaxhuar trafikun, për shkak të fluksit të shtuar të automjeteve gjatë sezonit veror.
Ndër fokuset e punës së Policisë Rrugore të Gjirokastrës janë evidentimi dhe ndëshkimi i drejtuesve të mjeteve që drejtojnë mjetin, në efektin e alkoolit, në gjendje të dehur ose pa leje drejtimi, kryejnë parakalime të gabuara dhe kalojnë limitin e shpejtësisë, shkelje që përbëjnë ndër shkaqet kryesore të aksidenteve rrugore.
Si rezultat i monitorimit, gjatë periudhës 24-31.08.2026, janë proceduar penalisht 4 drejtues mjetesh për veprat penale “Drejtimi i mjeteve në mënyrë të parregullt” dhe “Shkelja e rregullave të qarkullimit rrugor”, si dhe janë pezulluar 18 leje drejtimi.
Gjithashtu, gjatë kësaj periudhe, janë vendosur gjithsej 1441 masa administrative për shkelje të ndryshme të Kodit Rrugor, konkretisht:
335 masa për parakalime të gabuara;
549 masa për qarkullim me shpejtësi tej normave të lejuara;
379 masa për ndalim ose qëndrim të gabuar;
18 masa për mosvendosjen e kaskës mbrojtëse;
1 masë për përdorimin e celularit gjatë drejtimit të mjetit;
159 masa për shkelje të tjera të Kodit Rrugor.
Kontrollet nga Policia Rrugore do të vijojnë në të gjitha akset rrugore urbane, interurbane dhe rurale, duke përdorur të gjitha mjetet bashkëkohore logjistike, me qëllim përmbushjen e parametrave të sigurisë rrugore.
Policia Rrugore e Gjirokastrës apelon për të gjithë drejtuesit e mjeteve që të zbatojnë me rigorozitet rregullat e qarkullimit rrugor dhe të kontribuojnë në parandalimin e aksidenteve rrugore dhe rritjen e sigurisë rrugore.
Ftojmë qytetarët që të denoncojnë, në numrin pa pagesë 112, çdo shkelje të rregullave të qarkullimit rrugor.