Posta Shqiptare zgjedh punonjësit më të mirë të vitit‏

Në prag të ditës ndërkombëtare të punonjësve, Posta Shqiptare, një nga institucionet më të vjetra shqiptare, i krijuar që në 1912 atëherë kur u krijua edhe Shteti i parë shqiptar, vlerësoi punonjësit me performancë më të mirë.

Drejtori i Postës Shqiptare, Majlind Lazimi tha se institucioni që ai drejton ka për qëllim të rrisë konkurrencën pozitive në punë dhe të shtojë motivimin e punonjësve.

Nëpërmjet një sistemi votimi transparent, të bërë nga vetë punonjësit e postës për njeri tjetrin, Posta Shqiptare zgjodhi 15 punonjësit më të mirë të vitit.

Kjo nismë synon të kthehet në një traditë për këtë kompani publike çdo 1 Maj të çdo viti, ku punonjësit të ndihen të vlerësuar dhe motivuar që punojnë në Postën Shqiptare, një kompani lider në tregun e shërbimeve postare dhe kohët e fundit edhe në shërbimet financiare.

Gjatë eventit, Drejtori i Përgjithshëm i Postës i’u dorëzoi certifikatat për “Punonjësin e Vitit” 15 fituesve të 15 Filialeve, bashkë me një bonus të akorduar për ta për performancë të lartë në punë gjatë vitit 2014-2015.