Reshjet e borës kanë përfshirë zonat malore të qarkut të Kukësit, ndërsa temperaturat kanë pësuar rënie të ndjeshme gjatë orëve të fundit. Deri në këto momente nuk raportohen problematika apo vështirësi në qarkullimin e automjeteve. Rrugët kryesore mbeten të kalueshme, ndërsa strukturat përkatëse janë në gatishmëri për të ndërhyrë në rast se reshjet vijojnë me intensitet më të lartë.
Reshjet e borës në këtë periudhë konsiderohen të pazakonta, pasi ndodhemi në mes të stinës së pranverës. Aktualisht, shumë pemë frutore ndodhen në fazën e lulëzimit, çka i bën ato të ndjeshme ndaj temperaturave të ulëta dhe ngricave të mundshme.
Ekspertët e bujqësisë paralajmërojnë se një ulje e mëtejshme e temperaturave mund të ndikojë negativisht në prodhimin e këtij sezoni. Fermerët në zonë kanë nisur edhe mbjelljen e kulturave bujqësore, përfshirë pataten. Sipas specialistëve, deri në këto momente nuk raportohen dëme të konsiderueshme në këtë kulturë, por situata mbetet për t’u monitoruar në vazhdimësi, pasi kushtet atmosferike mund të ndikojnë në zhvillimin normal të bimëve.
