Prifti i Elbasanit çon Janullatos në prokurori, “aktivitet armiqësor ndaj Shqipërisë”

Prifti i kishës “Shën Maria” në Elbasan, At Nikolla Marku, ka depozituar në Prokurorinë e Përgjithshme një kallzim penal ndaj Kryepeshkopit të Kishes Ortodokse Autoqefale të Shqipërisë, Anastas Janullatosit. Ai e akuzon Janullatos për aktivitet armiqësor ndaj Shqipërisë, për shkelje të territorit shqiptar dhe lobim kundër Shqipërisë përmes partive të minoritetit grek.

At Nikolla Marku e ka shpallur armik të Shqipërisë Janullatos, duke renditur 12 akuza.

Prifti i kishës së “Shën Maria” në  Elbasan, At Nikolla Marku pasi e kallëzoi penalisht në Prokurorinë e Përgjithshme Anastas Janullatus, kërkon hetim të gjithanshëm për aktivitetin e Kryepeshkopit.

12 pikat e akuzave ndaj Anastas Janullatus që duhet të jenë objekt i hetimit i Prokurorit të Përgjithshëm, sipas Atn Nikolla Markut:

1-      Ndryshime në Statusin e Kishës Ortodokse pa bazë ligjore dhe teologjike

2-      Shkelje të statusit kishtar në favor të shovinizmit grek duke bërë propagandë të hapur dhe të fshehur në favor të Vorio- Epirit

3-      Liturgji meshtare në gjuhën greke

4-      Ndërtim i Sinodit të Shenjtë jashtë Statusit të vërtetë të kishës ortodokse shqiptare

5-      Ndërtim dhe restaurim i kishave në stilin grek

6-      Bashkëpunim i ngushtë me qeveri të ashtuquajtura Vorio Epir

7-      Bashkëpunim i ngushtë me parti ultranaziste greke Agimi i Artë

8-      Qarkullim Financash dhe pastrim parash për biznese dhe ndërtim kinse kishash (financime të dyshimta)

9-      Mungesë transparence për origjinën e financimit të institucionit kishtar

10-   Përfshirje e drejtpërdrejtë në glorifikim të viktimave të ushtrisë greke gjatë luftës italo-greke

11-   Shkelje e sovranitetit territorial, manipulim dhe deformim i traditës historike shqiptare në lidhje me Kishën Ortodokse Shqiptare

12-   Lobing kundër imazhit të vërtetë të republikës së Shqipërisë dhe historisë kombëtare fetare në bashkëpunim me partinë e Bashkimit të Drejtave të Njeriut, shoqatën “gomonia” si dhe lobin greko-amerikan me në krye Nikolas Geixh.

Për denoncimit drejtuar Prokurorit të Përgjithshëm Adriatik Llalla, është vënë në dijeni Presidenti i Republikës, Bujar Nishani, Kryetari i Kuvendit Ilir Meta, Kryeministri Edi Rama, deputetë, kryetarë të Komisionit të Sigurisë Kombëtare dhe trupi diplomatik i akredituar në Shqipëri.