Prof. Rozmari Jorganxhi Leka, dirigjentja e parë grua në Shqipëri, kujtohet në 90-vjetorin e lindjes

Nga Prof. Zef Çoba

Sot, në 90 vjetorin e lindjes kujtoj me respekt të veçantë e mirënjohje Prof. Rozmari Jorganxhi Leka, e cila lindi në  Korçë në një familje me tradita muzikore dhe patriotike.

Mësimet e para i mori në qytetin e saj të lindjes, e në vitin 1951, vazhdoi studimet për kanto në Liceun Artistik “Jordan Misja” të Tiranës, nën drejtimin e pedagoges së mirënjohur Marie Kraja. Në vitet 1952  – 1959 fitoi të drejtën të vazhdojë studimet e larta në Konservatorin “P. I.  Çajkjovskij” të Moskës, për kanto dhe dirigjim koral, formim të cilin e mbaroi me rezultate të shkëlqyera. Rozmari Jorganxhi është dirigjentja e parë grua në Shqipëri.

Në vitet 1959 – 1989 realizon një aktivitet të spikatur si soliste mezzosoprano në skenën e TKOB, duke realizuar shumë role nga repertori i njohur operistik, si dhe merr pjesë në jetën koncertale të këtij institucioni. Me repertorin e zgjedhur nga ariet e operave dhe këngëve popullore të përpunuara, ka realizuar regjistrime që kanë mbetur në fondin e zgjedhur të RTSH. Një prej tyre është edhe kënga e njohur dibrane “Kur e përcolla Ylberin” e realizuar me shoqërimin e Orkestrës Simfonike të RTSH-së,  përpunimin e së cilës ia pata dedikuar pedagoges time në shenjë nderimi e respekti. Emërohet dirigjente e Korit të TKOB, punë të cilën e  udhëhoqi me profesionalizem dhe   kërkesa të larta artistike nga viti 1967 deri në vitin 1984.

Rozmari Jorganxhi është në pedagogët e parë të Konservatorit të Tiranës sot UAT, në degët e kantos,  dirigjimit koral dhe ansambël dhome, duke dhënë në vitet 1962 – 1992  kontributin e saj të çmuar në formimin e disa brezave dhe shumë artistëve të njohur. Në mësimdhënje shquhej për korrektësinë, durimin, taktin pedagogjik, kulturën e gjërë profesionale, teknikën e artit të dirigjimit dhe ndikimin në formomin e  muzikantëve të rinj.

Për punën e përkushtuar  të realizuar me humanizëm, dashuri,  pasion dhe modesti, si artiste dhe si pedagoge, ka fituar respektin e opinionit publik, studentëve dhe të kolegëve, si dhe  është nderuar me shumë vlerësime si me titullin  “MJESHTËR I MADH”, dy herë me Urdhërin NAIM FRASHËRI i Kl. II, nga Universiteti i Arteve me rastin e 60 vjetorit u nderua me “KUPEN E MIRËNJOHJES”, “ANËTAR NDERI i” Shoqatës MIQTË E MUZIKËS  ” ROZAFA EXTRESSION etj.”. Në këtë 90 vjetor e kujtoj me respekt e mirënjohje për ndikimin e veçantë që pati në formimin tim profesional e artistik. Bashkëshorti i saj Kostandin Leka ishte studiues i njohur, pedagog pranë Unuversitetit të Tiranës. Është nëna e artistëve të mirënjohur Gjergj dhe Hektor Leka. Jeta e saj është  shembull   edukimi për  artistët e rinj. Ndërroi jetë me 28 shtator 2020 në Trieste – Itali, vend ku qëndroi pas viteve 90,  dhe punoi pranë Teatrit të Operas Guseppe Verdi të këtij Qyteti. Për këto vlera, Rozmari Jorganxhi Leka mbetet në emrat e artistëve më të respektuar,  e do të kujtohet përherë me nderim.