Projekt-buxheti 2020/ Ministrja Denaj: Papunësia do bjerë në 10.6%

”Do të ketë më shumë rritje ekonomike dhe reforma të rëndësishme. Papunesia do bjerë në 10.6% në vitin 2020”. Këto ishin premtimet dhe angazhimet e Anila Denajt, ministre e Financave, gjatë prezantimit të projekt-buxhetit për vitin 2020 në Konferencën e Kryetarëve në Kuvend. ”Shumë sektorë të ekonomisë kanë patur rritje. Turizmi këtë vit pati performancë të mirë”, tha ministrja. Denaj theksoi se konsolidimi fiskal ka dhënë efektet e tij për vitin 2019, ndërsa rritja e të ardhurave nga viti në vit është në shifrën 3.4%. ”Defiçiti buxhetor pritet të jetë 1.6% i PBB”, shtoi Denaj. Ministrja e Financave foli edhe për sektorin e arsimit ku, sipas saj, për vitin e ardhshëm do të jepen 3.3 miliardë lekë më shumë se këtë vit. Denaj premtoi gjithashtu lehtësira fiskale edhe për sektorin e automobilave në Shqipëri.