Prokurori nuk pranoi arrestimin e Neranxit
Nikollaq Neranxi u la i lirë pasi Prokurori nuk pranoi të firmosë arrestimin e tij.
Përfaqësuesi i akuzës është njohur me ngjarjen dhe vendosi që Neranxi të procedohet në gjendje të lirë me akuzën e kundërshtimit të punonjësit të rendit publik, rapororton Panorama.
“Pas 6 orë ndalimi të padrejtë dhe absurd nga Policia, tashmë jam lënë i lirë. Këtë ngjarje të shëmtuar do kemi kohë ta analizojmë në ditët në vijim.
Për momentin dua t’ju falënderoj të gjithëve për mbështetjen që më keni dhënë. Jam shumë i prekur nga reagimi juaj. Jam me fat që kam kaq shumë miq dhe dashamirës”.
Ky ka qenë statusi që biznesmeni ka publikuar në profilin e tij në “Facebook”, pak pasi kishte dalë nga Komisariati nr.6, ku qëndroi për 6 orë.
Neranxi thotë se nuk kishte fyer asnjë punonjës policie, siç pretendohej në njoftimin zyrtar të shpërndarë për mediat, por ishte provokuar nga vetë ata. Nga ana tjetër sipas policisë, Neranxi i ka sharë, ofenduar dhe kundërshtuar punonjësit e policisë që i kishin vënë gobë makinave të parkuara në një nga rrugët dytësore të autostradës.