Prokuroria dërgon për gjykim efektivin e policisë së Kavajës

Prokuroria e Kavajës ka përfunduar brenda 3 javëve hetimin dhe ka dërguar për gjykim kërkesën ndaj shtetasit Pajtim Muhaj, efektiv i Komisariatit të Policisë Kavajës, i akuzuar për veprën penale të “Kryerjes së veprimeve arbitrare”, parashikuar nga neni 250 i Kodit Penal. Prokuroria e Kavajës e regjistroi kryesisht procedimin në datë 20 Shkurt 2015, pasi në televizion u shfaq publikisht një video amatore, në të cilën i pandehuri, gjatë ushtrimit të detyrës, po rrihte një shtetas, i cili ishte i dyshuar për një vepër tjetër penale. Nga pamjet në videon amatore, konstatohet se efektivi i policisë Muhaj, ka goditur me shkelma në fytyrë personin e ndaluar, duke i shkaktuar dëme fizike.

Në bazë të hetimeve, rezultoi se rrahja që efektivi i policisë i bënte shtetasit të ndaluar ishte në tejkalim të parashikimeve të ligjit “Për policinë e Shtetit”.

Në përfundim të hetimeve, Prokuroria e Kavajës e akuzon shtetasin Pajtim Muhaj për veprën penale të “Kryerjes së veprimeve arbitrare”.