Prokuroria e Vlorës nis hetimin për takimin Flamurtari-Teuta

Minutat e fundit të takimit mes Flamurtarit dhe Teutës rezervuan skena të denja për një produksion tragji-komik. Pamjet e dhuruara ishin për të thënë më të paktën “të çuditshme”. Ku në fund gjithçka u konkretizua me golin i cili zhveshi dinjitetin e skuadrës durrsake, duke i dhuruar pikët e padëshiruara nga askush, vlonjatëve. Pas jehonës në media dhe reagimit zyrtar të klubit të Flamurtarit, i cili kërkoi jo vetëm të distancohej por edhe kërcënoi me bojkot nëse ky fenomen nuk merr vëmendjen e merituar, sot Prokuroria e qytetit të Vlorës bëri hapin e parë në drejtimin e duhur

Duke u bazuar tek neni 197/A/2 i kodit penal ku flitet për paracaktimin e ndeshjeve, prokuroria e këtij qytetit ka nisur zyrtarisht hetimin për ngjarjet e ndodhura gjatë ndeshjes së vlefshme për javën e 19-të të Kategorisë Superiore mes Flamurtarit dhe Teutës. Organi hetues i qytetit bregdetar i ka kërkuar tashmë drejtuesve të stadiumit të Flamurtarit të gjitha pamjet filmike të regjistruara nga kamerat e sigurisë, dhe nuk përjashtohen edhe seancat dëgjimore ku mund të përfshihen lojtarë e drejtues të lartë të të dyja skuadrave.

Nëse mblidhen provat e nevojshme që inkriminojnë një skuadër apo të dyja atëherë, kjo prokurori do t’ia kalojë çështjen gjykatës së qytetit të Vlorës. Kjo nuk është hera e parë që një takim futbolli në Shqipëri përfundon nën hetim, por në të gjitha rastet hetimi është mbyllur pa dhënë asnjë pretencë.

Ndërsa nesër pritet që të mblidhet komisioni i etikës pranë federatës shqiptare të futbollit për të shqyrtuar të gjitha episodet e kësaj përballjeje, por edhe për ngjarjet e ndodhura në fundin e ndeshjes mes Laçit dhe Partizanit, ku edhe aty hijet e trukimit janë të shumta.