Protesta sfidon strategjinë e komunikimit të qeverisë, Rama plan për zëvendësministra të posaçëm

Pavarësisht se kryeministri Edi Rama ka përjashtuar mundësinë e largimit nga drejtimi i qeverisë, protesta qytetare vazhdon të mbajë gjallë presionin politik në bulevardin kryesor të vendit. Ajo që po shqetëson mazhorancën nuk duket të jetë vetëm numri i protestuesve, por aftësia e revoltës për të mbetur në qendër të vëmendjes publike.

Në rrjetet sociale, ish-bashkëpunëtorë të kryeministrit po artikulojnë një narrativë ndryshe nga ajo zyrtare. Sipas tyre, protesta nuk ushqehet nga kundërshtarët politikë apo nga ndikime të jashtme, por nga një pakënaqësi e akumuluar që po gjen gjithnjë e më shumë hapësirë për t’u shprehur.

Në këtë sfond, qeveria duket se ka identifikuar një problem tjetër: komunikimin. Në çdo ministri pritet të caktohet një zëvendësministër me fokus të posaçëm komunikimin publik dhe koordinimin me deputetët. Synimi është që mesazhi i qeverisë të jetë më i pranishëm dhe më i sinkronizuar me shqetësimet e qytetarëve.

Ripostimet e mesazheve të kryeministrit dhe reagimet e koordinuara tregojnë përpjekjen e mazhorancës për të rifituar terren në debatin publik dhe për të zbehur ndikimin që protesta po fiton në hapësirën digjitale. Përballë protestës në rrugë dhe betejës për vëmendje në rrjet, sfida e qeverisë nuk duket më vetëm politike, por edhe komunikative.