Kryeministri Edi Rama ka lexuar në podkastin “Flasim” mesazhin e një qytetari të prekur nga tërmeti i vitit 2019, i cili prej gjashtë vitesh pret zgjidhje për banesën e dëmtuar. Sipas tij, rasti i Amos Mezurajt është një shembull i një “proteste legjitime”, që buron nga problemet reale të qytetarëve dhe jo nga motivime politike.
Rama tha se e kupton zhgënjimin e qytetarëve kur institucionet nuk japin zgjidhje në kohë, duke pranuar se administrata shpesh nuk arrin të përmbushë detyrimet e saj. Ai theksoi se raste të tilla i ka përcjellë pranë institucioneve përgjegjëse, përfshirë edhe Bashkinë e Tiranës, por zgjidhjet nuk kanë ardhur gjithmonë me shpejtësinë e duhur.
Kreu i qeverisë u ndal edhe te dallimi mes protestave të qytetarëve me halle konkrete dhe, siç i quajti ai, protestave të motivuara politikisht apo të nxitura nga interesa të tjera. Sipas Ramës, zemërimi i qytetarëve të zakonshëm është i kuptueshëm dhe shpesh i drejtë, pasi lind nga mungesa e përgjigjeve institucionale për vite me radhë.
Ai u bëri thirrje qytetarëve që të mos lejojnë që problemet e tyre të përdoren nga grupe që, sipas tij, nuk synojnë zgjidhje, por nxisin konflikt dhe përçarje. Rama theksoi se këta aktorë përfitojnë nga hallet e njerëzve për të ushqyer tensione të vazhdueshme.
Në të njëjtën kohë, ai pranoi se shumë çështje mbeten ende të pazgjidhura dhe se administrata ka nevojë për përmirësim të vazhdueshëm. Megjithatë, sipas tij, rruga nuk është shkatërrimi i institucioneve, por korrigjimi i tyre përmes punës së përbashkët dhe përgjegjësisë shtetërore.