”Që kur poshtërimi i vajzave dhe grave është revolucion”, deputetja Mila: Kritika nuk është leje për dhunë, përndjekje apo kërcënim

Aktualitet E Martë, 8 Shtator 2026 21:18

Deputetja e PS-së, Sara Mila, ka reaguar pas incidenteve të shënuara në ditën e parë të sesionit të ri Parlamentar këtë të martë, duke dënuar dhunën dhe poshtërimin ndaj grave në politikë. ”Sot, dy gra të PS-së u dhunuan. Po, u dhunuan”, shkruan Mila, duke theksuar se fakti që dhuna erdhi nga gra të tjera nuk e bën atë më pak të rëndë. Ajo kritikon sulmet dhe fyerjet e përdorura për klikime, ndërsa ngre shqetësimin për mesazhin që këto raste përcjellin te vajzat që duan të angazhohen në politikë. ”Kritika, protesta dhe satira kanë vendin e tyre në një shoqëri të lirë. Por asnjëra nuk është leje për dhunë, përndjekje apo kërcënim”, shprehet deputetja.

Postimi i plotë

QË KUR POSHTËRIMI I VAJZAVE DHE GRAVE ËSHTË REVOLUCION?

Dita e parë e këtij sesioni parlamentar duhej të ishte një ditë e mbarë, veçanërisht sepse një grua mori detyrën e nënkryetares së Kuvendit. Por është e vështirë të gëzohesh për një grua brenda kësaj salle, kur jashtë dyerve të saj gra të tjera bëhen shënjestër dhune e poshtërimi.

Prej muajsh, vajzat dhe gratë deputete të PS-së trajtohen si mish për top në garën e çmendur për klikime, ku fyerja shitet si humor dhe poshtërimi si guxim. Në këtë garë të memexhinjve harrohet, ose zgjidhet të harrohet, se përtej ekranit është një grua, një nënë, një motër, një vajzë.

Sot, dy gra të PS-së u dhunuan. Po, u dhunuan. Dhe fakti që kjo dhunë erdhi nga vajza e gra të tjera nuk e bën më pak të rëndë. Të veshësh petkun e revolucionares nuk të jep të drejtën të dhunosh një grua tjetër. Realiteti nuk është një hapësirë virtuale ku mund të bësh gjithçka për t’u bërë virale, pa menduar për njeriun që ke përballë dhe për pasojat që lë pas.

Ju e dini baltën me të cilën unë dhe familja ime përballemi çdo ditë. Tashmë më është regjur lëkura. Kam mësuar të vazhdoj punën, të mos ndalem e të mos e lejoj atë baltë të më përcaktojë. Por fakti që kam mësuar ta përballoj nuk do të thotë se duhet ta pranoj si normale. Nuk është normale. Dhe nuk duhet të bëhet kurrë kusht për të qenë grua në politikë.

Shpesh mendja më shkon tek ato vajza e gra që na shohin. Tek një vajzë që mendon të angazhohet, të thotë mendimin e saj, të marrë përgjegjësi për komunitetin ku jeton. Çfarë mendon ajo kur sheh një parlamentare të përndiqet, të shahet e të poshtërohet publikisht? A mendon se nesër mund të jetë radha e saj? A fillon të bindet se është më mirë të heshtë, të mos përfshihet, të mos ekspozohet?

Të jesh deputete do të thotë të japësh llogari për punën, votën dhe qëndrimet e tua. Kritika, protesta dhe satira kanë vendin e tyre në një shoqëri të lirë. Por asnjëra nuk është leje për dhunë, përndjekje apo kërcënim.