Qëndresa kundër Ramës, protestuesit ndahen mes mbrojtjes së natyrës dhe revoltës politike

Flamingoja është kthyer në simbolin e protestës kundër projektit të investimit prej 4 miliardë dollarësh në Zvërnec. Nismëtarët e quajtën atë “Revolucioni Flamingo”, duke marrë si emblemë shpendin që është rikthyer në Lagunën e Nartës dhe duke ngritur shqetësimin se projekti mund të dëmtojë zonën e mbrojtur.

“Jemi dakord që të bëhen investime, por jo në atë zonë. Ajo zonë është mrekulli, nuk duhet prekur”, u shpreh një nga qytetarët. Megjithatë, ndërsa flamingot dominojnë pankartat dhe mesazhet e protestës, jo të gjithë pjesëmarrësit duket se janë të informuar për ekosistemin që synojnë të mbrojnë. Disa prej tyre pranojnë se nuk e njohin zonën, nuk e kanë vizituar ndonjëherë dhe nuk dinë shumë për speciet që jetojnë aty.

“Nuk kam qenë ndonjëherë dhe nuk e di çfaër gjallesash janë aty. Qëllimi im që jam në protestës është vetëm largimi i qeveritarëve”, tha një tjetër qytetar. “Nuk e di, nuk kam qënë ndonjëherë. Nuk më interesojnë ato punë”, shtoi një tjetër protestues. Në ditën e 21-të të protestës, mbështetës iu bashkuan edhe nga Kosova, Maqedonia e Veriut dhe diaspora shqiptare. Shumë prej tyre e njohin Zvërnecin vetëm si destinacion turistik, por thonë se janë në shesh për të kërkuar një të ardhme më të mirë për vendin.

“Kam qenë vetëm si turist, një ditë dhe jam kthyer”, deklaroi një qytetar. “Nuk e di unë çfarë ka, unë jam kosovar me origjinë”, tha një protestues tjetër. Edhe pse në fjalimet e përditshme para Kryeministrisë përmenden vazhdimisht rëndësia e zonave të mbrojtura, ekosistemit dhe specieve të rralla, përgjigjet e disa protestuesve tregojnë se njohuritë për ndikimin e mundshëm të investimit mbeten të kufizuara.

“Nuk kam qenë ndonjëherë në Zvërnec, nuk e di sa larg ndodhet nga Vlora”, tha qytetari. “Nuk e kam idenë, nuk e kam shkelur atë zonë”, tha një tjetër qytetar. “S’ka lidhje me flamingot, këtu nuk kanë bukë të hanë”, deklaroi qytetari. Për një pjesë të pjesëmarrësve, çështja e flamingove dhe e Lagunës së Nartës është vetëm një nga arsyet e mobilizimit. Ata thonë se protesta përfshin edhe shqetësime më të gjera që lidhen me qeverisjen, shëndetësinë, arsimin dhe largimin e të rinjve nga vendi.