Qeveria miraton krijimin e rezervës së armatimeve dhe pajisjeve teknologjike për Forcat e Armatosura

Këshilli i Ministrave ka miratuar një vendim të ri që përcakton krijimin e rezervës së armatimeve dhe pajisjeve teknologjike për Forcat e Armatosura të Republikës së Shqipërisë nga subjektet e licencuara që operojnë në sektorin e mbrojtjes. Vendimi synon garantimin e gatishmërisë së Forcave të Armatosura, në rastet e shpalljes së gjendjes së luftës ose kur ekziston një rrezik i afërt dhe konkret i një agresioni ushtarak ndaj Shqipërisë apo aleatëve të saj strategjikë.

Sipas aktit të miratuar, subjektet e licencuara që ushtrojnë veprimtari në prodhimin dhe tregtimin e armatimeve, municioneve, pajisjeve dhe teknologjive ushtarake do të jenë të detyruara të krijojnë dhe të vënë në dispozicion rezerva të posaçme sipas kërkesave të përcaktuara nga Ministria e Mbrojtjes dhe Shtabi i Përgjithshëm i Forcave të Armatosura.

Për prodhuesit e armatimeve dhe pajisjeve teknologjike, sasia e rezervës që mund të aktivizohet nuk do të tejkalojë 5 % të kapacitetit të përgjithshëm vjetor të prodhimit. Ndërkohë, për subjektet që merren me tregtimin e këtyre produkteve, kufiri maksimal është 5 % e inventarit të destinuar për tregtim. Vendimi parashikon gjithashtu që shoqëria shtetërore e krijuar për prodhimin dhe tregtimin e armëve, municioneve dhe teknologjive ushtarake (KAYO) të mbajë një rezervë prej 25 % të kapacitetit të saj vjetor të prodhimit, nivel që mund të ndryshohet me vendim të Komitetit të Mbrojtjes dhe Sigurisë.

Rezervat do të aktivizohen me propozim të shefit të Shtabit të Përgjithshëm të Forcave të Armatosura dhe me urdhër të ministrit të Mbrojtjes. Pas marrjes së njoftimit nga Agjencia e Industrisë së Mbrojtjes, subjektet e licencuara do të duhet t’i japin përparësi krijimit dhe vënies në dispozicion të rezervës, pavarësisht detyrimeve të tjera kontraktore.

Vendimi përcakton edhe standarde të detyrueshme për ruajtjen e rezervave, duke përfshirë ambiente të certifikuara magazinimi, sisteme sigurie dhe monitorimi 24 orë në ditë, si dhe mirëmbajtjen periodike të pajisjeve për të garantuar funksionalitetin e tyre. Agjencia e Industrisë së Mbrojtjes do të jetë institucioni përgjegjës për monitorimin, kontrollin dhe verifikimin e zbatimit të këtij vendimi. Mosrespektimi i detyrimeve të përcaktuara mund të çojë deri në revokimin e licencës së subjektit. Vendimi hyn në fuqi pas botimit në Fletoren Zyrtare.