Qytetarët e Patosit dalin në protestë: Jemi të zhgënjyer, nuk duam të bashkohemi me Fierin

Dhjetëra qytetarë u mblodhën këtë të hënë përpara Bashkisë Patos për të kundërshtuar reformën e re administrative, e cila parashikon shkrirjen e kësaj bashkie dhe bashkimin e saj me Bashkinë Fier. Me pankarta dhe thirrjen “Larg duart nga Patosi”, protestuesit shprehën kundërshtimin ndaj çdo ndryshimi që, sipas tyre, rrezikon identitetin, historinë dhe të ardhmen e qytetit.

Banorët e konsiderojnë propozimin një tjetër goditje për Patosin, duke argumentuar se një vendim i tillë do të ndikonte më tej në shpopullimin e zonës. Ata kërkojnë që çdo vendimmarrje të paraprihet nga konsultimi me komunitetin dhe dëgjimi i zërit të qytetarëve.

“Jemi të zhgënjyer, nuk duam të bashkohemi me Fierin”, u shpreh një nga protestuesit. Për pjesëmarrësit në tubim, Patosi nuk është thjesht një njësi administrative, por një qytet me histori të lidhur ngushtë me industrinë e naftës dhe me kontributin e brezave të naftëtarëve në zhvillimin e tij. Sipas tyre, kjo trashëgimi duhet të merret në konsideratë përpara çdo ndryshimi territorial.