Kryeministri Edi Rama i pranishëm këtë të enjte pasdite në festën e 35-vjetorit të PS-së në Korçë, ka bërë një krahasim mes dy momenteve që mbajnë të njëjtën datë, por që përfaqësojnë momente krejtësisht të ndryshme për vendin. Rama u ndal te koincidenca e datës 26 maj, duke kujtuar fillimisht vitin 1996, kohë kur socialistët u përballën me dhunën e pushtetit të atëhershëm të PD-së, dhe duke e krahasuar atë me 26 majin e sukseseve të fundit në rrugën e integrimit europian.
”Një koincidencë e madhe bashkoi një datë, 26 majin. Dy momente domethënëse të PS. 26 maji i vitit 1996, ku socialistët u përballën med furinë e një dhune dhe brutaliteti që e vuri Shqipërinë përballë sfidës reale të ndërtimit të demokracisë. Ai moment e vendosi PS-në në një situatë jashtëzakonisht dramatike. Ata që ishin në vijën e parë u dhunuan barbarisht, ashtu sikundër u dhunua dhe u grabit rezultati i atyre zgjedhjeve nga pushteti i degraduar i PD-së”,-u shpreh kreu i qeverisë.
Nga ana tjetër, Rama vijoi me tone të ashpra akuzat ndaj ish-pushtetit të djathtë, duke deklaruar se ajo periudhë ishte një regjim i vërtetë brutal, ku liria e opozitës shtypej me dhunë, diçka që sipas tij sot është e papërfytyrueshme. ”Ai 26 maj sot është i papërfytyrueshëm. Opozita dhunohej rregullisht. Shqipëria e asaj kohe kishte vetëm një gazetë opozitare, dhe edhe ajo u bë shkrumb e hi nga ai që ishte vërtet një regjim brutal. Ndërsa para pak ditëve, pikërisht më 26 maj, PS e ngjiti Shqipërinë edhe një majë më lart, në majën që kemi amanet nga të parët tanë, ku gjendet shtëpia e Europës së Bashkuar. Sot ia kemi ngritur kokën çdo shqiptari kudo në botë”,-tha Rama.
