Rama: Asnjë qeveri italiane s’ka bërë kaq shumë për Shqipërinë. Meloni: Folëm për emigracionin dhe mbrojtjen

Aktualitet Kryesore E Enjte, 16 Prill 2026 19:12

Kryeministrja e Italisë, Giorgia Meloni shkruan se takimi me kryeministrin Edi Rama shërbeu për të vlerësuar progresin e arritur në marrëdhëniet dypalëshe. Meloni tregon se në tavolinën me Ramën, tema u fokusua te mbrojtja, emigracioni dhe forcimi i bashkëpunimit mes dy vendeve, si dhe te çështje me interes të përbashkët në nivel rajonal dhe evropian.

”Pesë muaj pas Samitit Ndërqeveritar të nëntorit, takimi i sotëm në Palazzo Chigi me Kryeministrin e Republikës së Shqipërisë, Edi Rama, bëri të mundur vlerësimin e forcimit të partneritetit midis kombeve tona në sektorët me interes të përbashkët, me një fokus të veçantë në lidhshmëri, mbrojtje dhe bashkëpunim në luftën kundër imigracionit të parregullt”, shkruan Meloni.

Më herët kryeministri Edi Rama theksoi në një postim në Facebook, se Italia ka qenë gjithmonë pranë Shqipërisë, por qeveria Meloni bën një dallim të fortë për zhvillimin dhe sigurinë e Shqipërisë

“Të gjitha qeveritë e Italisë në 35 vitet e fundit kanë qenë posaçërisht dashamirëse ndaj Shqipërisë, por asnjë qeveri italiane nuk ka vënë në lëvizje një program kaq të ngjeshur bashkëpunimi strategjik me Shqipërinë, sa qeveria e Giorgia Melonit. Afrimi i mëtejshëm me Italinë përmes projekteve të mëdha e konkrete sjell më shumë zhvillim e siguri për Shqipërinë”.